Шимолий Корея етакчиси Ким Чен Ин мамлакат давлат ишлари президенти лавозимига қайта сайланди. Бу ҳақда КХДР Марказий телеграф агентлиги (KCNA)га таяниб Reuters хабар берди.
Тегишли қарор 22 март куни пойтахт Пхеньян шаҳрида ўтказилган Олий халқ мажлисининг (парламент) биринчи сессиясида қабул қилинган.
“Олий халқ мажлиси ўзининг 15-чақириқ биринчи сессиясида ўтган кунги илк давлат тадбири доирасида Ким Чен Инни Корея Халқ Демократик Республикаси давлат ишлари президенти этиб қайта сайлади”, дея хабар беради KCNA.
Ким Чен Иннинг ушбу олий лавозимга қайта тайинланиши у учун кетма-кет учинчи муддат бўлди. Давлат ишлари комиссияси 2016 йилда мамлакатнинг сиёсий йўналишни белгиловчи энг юқори органи сифатида ташкил этилган эди.
КХДР парламенти мамлакат сиёсатини расман маъқулловчи орган ҳисобланади. Одатда у ҳукмрон “Меҳнат партияси” съездидан сўнг партия қарорларини қонун даражасига кўтариш учун чақирилади.
“Икки душман давлат” сиёсати
Сиёсий таҳлилчиларнинг эътибори Пхеньяннинг конституцияни қай даражада ўзгартиришига қаратилган. Хусусан, Ким Чен Иннинг Жанубий Кореяга нисбатан “икки душман давлат” тамойилини расмийлаштириш масаласи долзарб бўлиб турибди. Сўнгги йилларда Шимолий Корея етакчиси Сеул билан тинч йўл орқали бирлашиш мақсадидан воз кечиб, қўшни давлатни душман сифатида қайта таърифламоқда.
Кузатувчилар орасида энг кўп муҳокама қилинаётган жиҳатлардан бири — Ким Чен Иннинг синглиси Ким Ё Жонгнинг Давлат ишлари комиссияси аъзолари рўйхатида йўқлиги бўлди. У 2021 йилдан буён мамлакатнинг ушбу энг олий бошқарув органида фаолият юритиб келаётган эди.
Жанубий Корея Бирлашиш вазирлиги ушбу ҳолат сабабларини ўрганаётганини билдирди. Бироқ экспертлар бу унинг нуфузи тушиб кетганини англатмаслигини таъкидламоқда.
“Унинг рўйхатда йўқлиги мақоми пасайганидан эмас, балки ролларнинг стратегик тақсимланишидан далолат беради”, дейди Кённам университети профессори Лим Эул Чул.
Экспертнинг фикрича, Ким Ё Жонг ҳукмрон “Меҳнат партияси” бўлим мудири сифатида реал ҳокимиятни сақлаб қолади ва партия доирасида сиёсатни мувофиқлаштирувчи янада юқори даражадаги вазифаларни бажариши мумкин.
