Ҳиндистоннинг Жаркханд штатида мудҳиш воқеа юз берди. Маҳаллий аҳоли бир аёл ва унинг гўдагини жодугарликда айблаб, ваҳшийларча ёқиб юборди. Бу ҳақда BBC хабар берди.
Штат полицияси хабарига кўра, мазкур жиноятда гумонланиб ҳозирча тўрт киши ҳибсга олинган. Ҳужум пайтида аёлнинг турмуш ўртоғи ҳам оғир тан жароҳати олган ва ҳозирда шифохонада қолмоқда.
Фожиага нима сабаб бўлди?
Воқеа штат пойтахти Ранчидан 250 километр узоқликда жойлашган, қашшоқлик ва хурофотлар авж олган Кудсай қишлоғида содир бўлган. Қишлоқ аҳолиси ўртасида гўёки чорва молларининг тўсатдан нобуд бўлиши ва маҳаллий фуқаро Пустун Бируанинг вафоти ҳақида миш-мишлар тарқалган.
Марҳумнинг рафиқаси Жано Бируа турмуш ўртоғи бетоблигида шифокорга эмас, норасмий тиббиёт ходими (табиб)га мурожаат қилганини айтади:
“Биз камбағал одамлармиз, уни узоқдаги шифохонага олиб боришга имконимиз йўқ эди”, дейди у.
Табиб эса касаллик жисмоний эмас, балки сеҳр-жоду оқибати эканини айтади. Шундан сўнг, қишлоқ аҳолиси Жёти Синку исмли аёлни “жодугарлик”да ва ўлимга сабабчи бўлишда айблай бошлайди.
“Ялиниб сўрадим, лекин қулоқ солишмади”
Сешанба, 17 февраль оқшомида ўнлаб кишидан иборат оломон Синкунинг хонадонига бостириб кириб, аёл ва унинг 10 ойлик ўғлини ёқиб юборади. Касалхонада ётган оила бошлиғи Колхан Синку ўша машъум тунда рафиқаси ва фарзандини қутқаришга ҳаракат қилганини кўзда ёш билан эслайди:
“Мен қўлларимни қовуштириб, улардан ушбу масалани қишлоқ кенгашида ҳал қилишларини сўраб ялиниб-ёлвордим. Аммо босқинчилар мени эшитишни ҳам хоҳламади”, деди у.
Ҳиндистон Миллий жиноятларни қайд этиш бюроси маълумотларига кўра, 2000-йилдан 2016-йилгача мамлакатда 2500 дан ортиқ киши, асосан, аёллар жодугарликда айбланиб ўлдирилган.
Вазиятнинг бу даражада оғирлигига сабаблардан бири эса тиббиётнинг йўқлигидир. Узоқ қишлоқларда шифокорлар йўқлиги сабабли аҳоли сохта табибларга таяниб қолган. Айни пайтда, қашшоқ ва саводсиз қабилалар яшайдиган ҳудудларда ҳар қандай касаллик ёки омадсизлик сеҳр-жоду билан боғланади.
Ҳозирда полиция қотилликда иштирок этган бошқа шахсларни қидирмоқда. Расмийлар қишлоқ жойларда хурофотга қарши тушунтириш ишларини олиб боришга ваъда бермоқда.
