АҚШ раҳбарияти томонидан кўриб чиқилаётган Эрон бўйича сценарийлардан бири — ислом республикасининг 86 ёшли олий раҳнамоси Оятуллоҳ Али Хоманаий ва унинг 56 ёшли ўғли Можтабани ўлдириш эҳтимолини ўз ичига олади. Бу ҳақда президент Дональд Трампинг юқори мартабали маслаҳатчисига таяниб Axios портали хабар берди.
“Уларда ҳар қандай вазият учун режа бор. Сценарийлардан бирида Оятуллоҳ, унинг ўғли ва муллалар ўлдирилади. Ҳеч ким, президентнинг ўзи ҳам қайси сценарийни танлашини ҳали билмайди”, деди Axios суҳбатдоши.
Порталнинг яна бир манбасига кўра, Хоманаий ва унинг ўғлини йўқ қилиш режаси Трампга бир неча ҳафта олдин таклиф қилинган. Шу билан бирга, Трамп маъмурияти Эронга уранни “кичик, рамзий даражада бойитиш”га рухсат бериш вариантини ҳам кўриб чиқиши мумкин.
“Трамп муҳим аҳамиятга эга ва мамлакат ичида сиёсий жиҳатдан илгари суриладиган битимни қабул қилишга тайёр бўлади”, деди Axios суҳбатдошларидан бири.
Трамп 19 февраль куни Эронга 10-15 кун муҳлат берди
АҚШ ва Эрон февраль ойи бошида Уммон воситачилигида ядровий дастур бўйича музокараларни қайта бошлади. Билвосита музокараларнинг иккинчи раунди 17 февраль куни Женевада бўлиб ўтди.
Музокаралар фонида АҚШ минтақадаги ҳарбий иштирокини кескин кучайтирди. Трамп у ерга иккинчи авиаташувчи кемасини, шунингдек, қўшимча кемалар ва авиацияни юборишни буюрди. 19 февраль куни эса АҚШ президенти музокаралар натижасиз якунланса, Эронни “ёмон оқибатлардан” огоҳлантирди.
Эрон вакиллари АҚШ билан музокараларда уранни бойитишни вақтинча тўхтатиб туришни таклиф қилган. Аммо Вашингтон бу жараённи тўлиқ тўхтатишни талаб қилмоқда.
Мутахассислар фикрича, АҚШ Эронга авиазарбалар бериш учун етарли ҳарбий кучларга эга. Мамлакат армияси 21 февралдан бошлаб Эронга зарба беришга тайёр, бироқ ҳарбийлар президент Дональд Трампнинг якуний буйруғини кутмоқда. Эҳтимол операцияда Исроил ҳам иштирок этиши мумкин. Яҳудий армияси юқори шай ҳолатга келтирилган.
Январь ойида Трамп Эронда ҳукуматга қарши намойишга чиққанларга “ёрдам йўлда” эканини ваъда қилган эди. Ўшанда Abraham Lincoln кемаси Яқин Шарқ томон йўл олган. Бироқ намойишлар бостирилган ва Трамп эътиборини Эроннинг ядровий дастурига қаратган.
Эрон ихтиёрида бўлган 60 фоизгача бойитилган 440 килограмм ураннинг қаердалиги ва ҳолати ҳануз ноаниқ. Агар бу уран 90 фоиздан юқори даражагача бойитилса, 10 та ядровий қурол ясаш учун етарли бўлиши мумкин.
