Бугун, 14 июнь куни Женевада АҚШ ва Эрон ўртасидаги тинчлик меморандуми имзоланиши мумкин. Бу ҳақда “Reuters” хабар берди.
Нашр манбаларининг сўзларига кўра, ҳужжатни Америка Қўшма Штатлари вице-президенти Жей Ди Вэнс ва Эрон парламенти спикери Муҳаммад Боғир Ғолибоф имзолаши кутилмоқда.
Нашрнинг қайд этишича, меморандум лойиҳасида Ҳормуз бўғозининг очилиши эвазига Эрон активларини блокдан чиқариш ва нефть санкцияларини бекор қилиш кўзда тутилган. Эрон ядро дастури масаласи эса кейинги 60 кунлик музокаралар давомида муҳокама қилинади ва бу музокаралар якунда дастурнинг тугатилиши ҳамда бойитилган уран захираларининг йўқ қилинишига олиб бориши керак.
Шу билан бирга, Эрон Ташқи ишлар вазири Аббос Ароқчи захираларнинг мамлакат ичида йўқ қилиниши Теҳрон учун ягона мақбул вариант эканини айтган.
Нашр суҳбатдошларининг айтишича, томонлар, шунингдек, Эронга компенсация тўланиши эҳтимоли ва ракета дастурини чеклаш бўйича талаблардан воз кечишни ҳам муҳокама қилмоқда, бироқ америкалик расмийлар ушбу маълумотни рад этмоқда.
“Эрон ўз мажбуриятларини бажармагунча унинг ҳеч қандай маблағи блокдан чиқарилмайди. Ҳормуз бўғози очилади. Эрон террорчи гуруҳларни молиялаштиришни тўхтатади. Улар мана шунга келишиб олдилар. Бу натижаларга асосланган келишувдир”, дейди “Reuters” манбаларидан бири.
