Қирғизистоннинг Ош–Алай автомобиль йўлида сел оқими оқибатида камида олти киши ҳалок бўлди. Бу ҳақда “24.kg” нашри хабар берди.
Маълум қилинишича, фожиа ҳақидаги хабар 24 июнь куни соат 14:17 да келиб тушган. Трассанинг 58-километрида сел оқими юз берганидан сўнг воқеа жойига қутқарувчилар ва тезкор гуруҳ юборилган.
Дастлабки маълумотларга кўра, сел енгил автомобилни оқизиб кетган. Ҳозирда ҳалок бўлганлар ва жабрланганларнинг шахси, шунингдек, машинада бўлган одамларнинг аниқ сони аниқлаштирилмоқда.
Қутқарувчилар ҳозир ҳам воқеа жойида иш олиб бормоқда.
Маҳаллий ҳокимият маълумотларига кўра, 2026 йил бошидан буён Қирғизистонда 240 дан ортиқ сел оқими қайд этилган.
Қирғизистон Фавқулодда вазиятлар вазирининг биринчи ўринбосари Акилбек Мазариповнинг билдиришича, селлар сони 2024 йилга нисбатан қарийб икки баробарга ошган. Ўшанда мамлакатда 133 та шундай ҳолат қайд этилган эди.
Унинг сўзларига кўра, табиий офатлар сони кўпайганига қарамай, ҳалок бўлганлар сони сезиларли даражада камайган.
“Жорий йилдаги сел оқимлари натижасида икки киши ҳалок бўлди. Бироқ инсон қурбонлари анча камайди. 2024 йилда табиий офатлар қурбонлари сони 25 нафарни ташкил этган эди. Бу давлат томонидан кўрилган чора-тадбирлар самарасидир”, деган Акилбек Мазарипов.
Қирғизистон ФВВ селлар сонининг ортишига иқлим ўзгариши сабаб бўлаётганини таъкидлаган. Мамлакатда хавфни камайтириш мақсадида 21 та ҳудуд белгиланиб, дарё соҳилларини мустаҳкамлаш, ҳимоя иншоотлари қуриш ва фавқулодда вазиятлар ҳақида эрта огоҳлантириш тизимларини жорий этиш бўйича лойиҳалар амалга оширилмоқда.
