Россия Давлат думасига мигрантларнинг ҳар бир халқаро банк ўтказмаси учун 3 фоиз миқдорида йиғим ундиришни назарда тутувчи қонун лойиҳаси киритилди. Бу ҳақда “Справедливая Россия” партияси раҳбари Сергей Миронов маълум қилди.
Унинг айтишича, мигрантларнинг аксарияти Россияда солиқ тўламайди, бироқ мамлакатдан катта маблағларни чиқариб, Марказий Осиё давлатлари иқтисодиётига йўналтирмоқда.
“Россия бюджети бу пул оқимидан ҳеч қандай даромад олмаяпти – на солиқ, на йиғим. Барча фойдани пул ўтказмалари учун комиссия оладиган тўлов тизимлари ва банклар кўрмоқда. Бу каби хайрияга чек қўйиш вақти келди”, деган Миронов.
Депутатнинг таъкидлашича, трансчегаравий пул ўтказмаларининг асосий қисми мигрантлар ҳиссасига тўғри келади. Статистикага кўра, ўтган йили Қирғизистонга рекорд даражада – 3,2 миллиард доллар ўтказилган. Ўзбекистонга юборилган маблағлар ҳажми эса 2025 йил якунлари бўйича 15 миллиард долларга етган.
Қонун ташаббускорлари ҳар бир халқаро пул ўтказмаси суммасининг 3 фоизигача бўлган мажбурий йиғим жорий этишни таклиф қилмоқда.
Мироновнинг ҳисоб-китобларига кўра, мазкур қонун қабул қилинса, Россия бюджети ҳар йили қўшимча равишда 45 миллиард рублдан ортиқ маблағ олиши мумкин.
Аввалроқ, Россия Давлат думасида мигрантлар учун тил имтиҳонини топшириш қоидаларини янада қатъийлаштириш таклифи ҳам илгари сурилган эди.
