АҚШ ҳарбийлари 20 январь куни Венесуэлага тегишли навбатдаги нефть танкерини қўлга олди. Бу АҚШ Жанубий қўмондонлиги (SOUTHCОМ) томонидан амалга оширилган еттинчи шундай операциядир. Бу ҳақда Жанубий қўмондонликнинг ижтимоий тармоқлардаги баёнотига таяниб, CBS News хабар беради.
Жанубий қўмондонлик маълумотларига кўра, сешанба куни эрталаб ҳарбийлар “Сагитта” юк кемасини ҳеч қандай кўнгилсиз ҳодисаларсиз тўхтатган ва назорат остига олган. Мазкур кема президент Дональд Трамп томонидан санкцияга тушган кемалар учун Кариб денгизида ўрнатилган карантин тартибини бузганликда айбланмоқда.
“Ушбу ҳаракат Венесуэладан чиқиб кетаётган ҳар бир томчи нефть фақат қонуний ва тегишли тартибда мувофиқлаштирилган бўлишини таъминлаш борасидаги қатъиятимизни намойиш этади”, дейилади АҚШ Жанубий қўмондонлиги хабарида.
Қўмондонлик, шунингдек, “Сагитта” кемасининг ҳавода олинган махфий бўлмаган видео тасвирларини ҳам эълон қилди. Операциянинг бошқа тафсилотлари ва кеманинг кейинги тақдири ҳақида ҳозирча маълумот берилмаган.
“Соялар флоти” ва санкциялар
АҚШ Молия вазирлигининг Хорижий активларни назорат қилиш бошқармаси (OFAC) маълумотларига кўра, “Сагитта” кемаси Панама байроғи остида сузади. Кема эгаси — Сunne Cо Limited компанияси бўлиб, у санкцияга тушган яна бир қанча кемаларга ҳам эгалик қилади. Мазкур танкер Эрон, Россия ва Венесуэла каби санкция остидаги давлатлардан нефть ташувчи “Соялар флоти” (shadow sheet) таркибига кирган.
АҚШ 2025 йил 10 декабрдан буён Венесуэлага тегишли жами еттита танкерни қўлга олди. Улар Кариб денгизи минтақасида ва Атлантика океанида тўхтатилган. Сўнгги марта қўлга олинган нефть танкери “Вероника” деб аталиб, у 15 январь куни Гайана байроғи остида сузаётганида эгалланган эди.
Маълумот ўрнида, 2025-йилда Кариб денгизида ҳарбий иштирокини кучайтирган АҚШ кучлари 2026 йил январь ойи бошида Венесуэла ҳудудига кириб, мамлакат етакчиси Николас Мадуро ва унинг рафиқасини қўлга олган эди. Ҳозирда улар Нью Йоркда бўлиб, наркотрафик ва картеллар билан ҳамкорлик қилишда айбланмоқда. Мадуро ва унинг рафиқаси ушбу айбловларни рад этиб келади.
Венесуэла нефтьи ва АҚШ манфаатлари
Венесуэла дунёдаги энг йирик нефть захираларидан бирига эга. Трамп маъмурияти ҳозирда Америка нефть компанияларини ушбу захираларга сармоя киритишга кўндиришга ҳаракат қилмоқда. CBS News телеканалига АҚШ расмийсининг маълум қилишича, ўтган ҳафтада Вашингтон илк бора Венесуэла нефтьининг қарийб 500 миллион долларлик илк партиясини сотган.
