Венгрия Европа Иттифоқининг Украинага 90 миллиард евро миқдорида кредит ажратиш тўғрисидаги қарорини тўсиб қўйди. Бу ҳақда кеча, 20 февраль куни мамлакат Ташқи ишлар вазири Петер Сийярто ўзининг X ижтимоий тармоғидаги саҳифасида маълум қилди.
Унинг айтишича, Венгрияга “Дружба” нефть қувури орқали нефть транзити тикланмагунча мазкур кредитни маъқуллашга розилик берилмайди.
“Биз Европа Иттифоқининг Украина учун 90 миллиард евролик кредитини Венгрияга “Дружба” нефть қувури орқали нефть транзити қайта тикланмагунча блоклаймиз”, деб ёзган у ва Киевни “шантаж”да айблаган.
Венгрия Ташқи ишлар вазирига кўра, нефть транзитининг тўхтатилиши “Брюссель ва венгер мухолифати билан мувофиқлаштирилган ҳолда” амалга оширилган бўлиб, бу мамлакатда ёқилғи таъминотида узилишлар келтириб чиқариш ва 12 апрелга белгиланган парламент сайловлари олдидан ички сиёсий вазиятга таъсир ўтказиш мақсадини кўзлаган.
Венгрия Бош вазири Виктор Орбан ҳам молиявий ёрдам блокланганини тасдиқлаган.
“Украина “Дружба” нефть қувурини ёпиб турган экан, Венгрия 90 миллиард евролик ҳарбий кредитни блоклашда давом этади. Бизга шантаж ўтмайди!” дейди у Facebook саҳифасида.
