Бугун, 4 апрель куни Россия қўшинлари Днепропетровск вилоятидаги Никополь шаҳрига зарба берди. Оқибатда беш киши ҳалок бўлди, яна 19 киши яраланди. Бу ҳақда Днепропетровск вилояти ҳарбий маъмурияти раҳбари Александр Ганжа ўзининг Telegram-каналида маълум қилди.
More stories“Душман FPV-дронлари билан зарба берди. Ёнғин келиб чиқди. Савдо павильонлари ва дўкон вайрон бўлди. Беш киши – 3 аёл ва 2 эркак ҳалок бўлди”, деб ёзди у.
Унинг билдиришича, яраланганлар орасида 14 ёшли қиз ҳам бор, у оғир аҳволда шифохонага ётқизилган.
4 апрелга ўтар кечаси Россия Суми шаҳрига ҳам зарба берган: дрон шаҳар марказидаги 16 қаватли тураржой биносининг 13-қаватига урилган. Оқибатда 11 киши, шу жумладан бир бола жароҳатланган.
Шунингдек, кеча, 3 апрель куни Киев вилоятида Россия дрони ветеринария клиникасига тушган. Оқибатда 20 га яқин ҳайвон нобуд бўлди.
Қайд этиш жоиз, Россия мунтазам равишда Украинанинг фуқаролик объектларига зарбалар бермоқда. 28 мартга ўтар кечаси Одессада дронларнинг оммавий ҳужуми оқибатида тураржой бинолари ва туғруқхона зарар кўрди, икки киши ҳалок бўлди, бир бола билан бирга 11 киши яраланди. 14 мартга ўтар кечаси эса Киев ва вилоятга берилган зарба тўрт кишининг ҳаётига зомин бўлди, минтақанинг яна 15 нафар аҳолиси жабрланди.
