Озарбайжон президенти Илҳом Алиев Эронни Нахчивон автоном республикасига дронлар ҳужумида Эронни айблаб, буни “террорчилик акти” деб атаганди. Эрон ташқи ишлар вазири Аббос Ароқчи улар бу ҳужумга алоқадор эмаслигини таъкидлади. Бу ҳақда Al Jazeera хабар берди.
Дронлар ҳужумидан сўнг Эрон ташқи ишлар вазири озарбайжонлик ҳамкасби Жайҳун Байрамов билан телефон орқали суҳбатлашди. У ҳужум ортида Исроил бўлиши мумкинлигини айтиб, бу ҳаракат Эроннинг қўшнилар билан муносабатларини бузишга қаратилганини билдирди.
Нахчивон 2025 йили Арманистон ва Озарбайжон ўртасида имзоланган АҚШ воситачилигидаги тинчлик келишувининг бир қисми эди. Келишувда “Трампнинг халқаро тинчлик ва фаровонлик йўлаги” деб номланган қуруқлик коридори назарда тутилган. У орқали Озарбайжонни Нахчивон эксклави билан боғлайдиган йўл қуриш, Арманистон ва Озарбайжон ўртасида транзит йўлагини яратиш режалаштирилган. Бу лойиҳани ривожлантириш ҳуқуқи АҚШга берилган.
Эрон эса узоқ вақтдан бери “Зангезур йўлаги” деб ҳам аталадиган бу транзит лойиҳасига қарши чиқиб келади. Теҳрон бу йўл Эронни Арманистон ва Кавказнинг қолган қисми билан алоқадан узиб қўйиши ҳамда Эрон чегаралари яқинида унга душман бўлган кучларнинг пайдо бўлишига олиб келишидан хавотирда.
Al Jazeera мухбири Ресул Сердарнинг айтишича, Эрон узоқ вақтдан бери Озарбайжон ҳукуматини мамлакатни Исроил жосуслик базасига айлантиришда айблаб келмоқда.
“Улар Алиевни Эроннинг шимолий чегарасидан унинг хавфсизлигига путур етказишда айбламоқда. Эрон бир неча бор агар Озарбайжон буни тўхтатмаса, жазоланишини айтган”, деди Сердар.
Унинг фикрича, 5 март куни содир бўлган дрон ҳужумлари Озарбайжон ҳукуматига аниқ сигнал ҳисобланади.
“Эрон қўшни давлатлар, Форс кўрфази, Туркия ва энди Озарбайжон билан зиддиятга киришмоқда”, деди у.
