Самарқанд вилоятинг Пастдарғом туманида судья пора билан қўлга тушди. Бу ҳақда Давлат хавфсизлик хизмати хабар берди.
Қайд этилишича, мазкур туман судининг 2022 йилдаги ҳал қилув қарорига асосан, 1989 йилда туғилган аёлнинг 4 ёшли фарзанди вояга етгунига қадар жавобгар ҳисобланган 1983 йилда туғилган фуқародан алимент ундириш белгиланган. Аммо жавобгар томон ушбу қарорни янги очилган ҳолатлар бўйича қайта кўриб чиқиш тўғрисида ФИБ Пастдарғом туман судига ариза билан мурожаат қилган.
Судья эса ўз иш юритувига келиб тушган ушбу аризага асосан, жорий йилнинг 27 февраль куни суднинг 2022 йилдаги ҳал қилув қарорини бекор қилиб, ишни мазмунан қайта кўришни 11 март кунига тайинлаган.
Шунингдек, у ишни даъвогарнинг фойдасига ижобий ҳал этиб бериш эвазига ундан 300 АҚШ доллари талаб қилган.
Ўтказилган тезкор тадбирда, ФИБ Пастдарғом туман судининг судьяси 300 АҚШ доллари миқдорида пора олган вақтида ашёвий далиллар билан ушланган.
Ҳозирда ушбу ҳолат бўйича Жиноят кодексининг 210-моддаси (пора олиш) 2-қисми “в” банди билан жиноят иши қўзғатилиб, тергов ҳаракатлари бошланган.
