Тошкент шаҳри Миробод туманида спа салон ниқоби остида фоҳишахона ташкил этиб, қизларни интим хизмат кўрсатишга мажбурлаган жиноий гуруҳ қўлга олинди. Бу ҳақда пойтахт ички ишлар бош бошқармаси ахборот хизмати хабар бермоқда.
Қайд этилишича, 3 нафар аёл ўзаро тил бириктириб, спа салон ҳудудида фоҳишахона ташкил этгани аниқланган. Улар Telegram орқали официантлик бўйича вакансиялар эълон қилиб, турли ваъдалар билан қизларни ўзларининг тузоғига илинтиришган.
Қизлар уларга ишониб, салон ҳудудига келганидан сўнг шахсий буюмлари олиб қўйилиб, бино ертўласига тушириб, қайтиб чиқишига йўл қўйишмаган. Шунингдек, қизлар зўравонлик ва таҳдидлар орқали мижозларга интим хизмат кўрсатишга мажбурланган. Хизмат кўрсатишдан бош тортган қизлар доимий равишда калтакланган.
“‘Клиент’ келган пайтда чиқмаганимизда хонамизга кириб, баланд пошнали туфлилар билан уришарди, сочимиздан тортишарди. Йиғлайсизми, бошқа нарса қиласизми уларга умуман фарқи йўқ эди. Овқат бермасдан ишлатишарди. ‘Айтганимни қилмасанг, шармандангни чиқариб, кийимсиз кўчага ҳайдайман, ўлсанг, ўлигингни ҳам ҳеч ким тополмайди’, деб қўрқитишарди”, дейди жабрланувчилардан бири.
Тезкор тадбир давомида яна етти нафар қиз ушбу салонда массаж хизмати ниқоби остида фоҳишалик билан шуғулланиб келаётгани ҳам аниқланган.
Ушбу жиноий гуруҳ интим хизмат кўрсатиш эвазига 320 АҚШ доллари ҳамда 6 миллион 250 минг сўм миқдордаги пул маблағларини олган вақтида далилий ашёлар билан ушланган.
Ҳолат юзасидан Жиноят кодексининг 135-моддаси 2-қисми (одам савдоси) билан жиноят иши қўзғатилган. Ҳозирда тергов ҳаракатлари давом этмоқда.
