Бугун, 31 мартга ўтар кечаси Украина дронлари Ленинград вилоятига зарба берди. Маҳаллий вақт билан соат 06:00 ҳолатига кўра, минтақа узра 38 та дрон уриб туширилган. Бу ҳақда вилоят губернатори Александр Дрозденко ўзининг Telegram-каналида маълум қилди.
More stories“Усть-Луга портида шикастланишлар бор”, деб ёзди Дрозденко тафсилотларга тўхталмай.
Ленинград вилояти раҳбарининг сўзларига кўра, Киров туманидаги Молодцово посёлкасида дрон қолдиқлари тушиши оқибатида “учта тураржой биносидаги (жами 30 тагача хонадон) ойналар, ўрта мактабнинг иккита хонаси ва капитал таъмирланаётган Ижтимоий ҳимоя маркази биноси шикастланган”, шунингдек, гаражлар ва қозонхонада ёнғин чиққан.
Унинг айтишича, уч нафар маҳаллий турғунга, жумладан, икки нафар болага тиббий ёрдам кўрсатилган. Дрозденко уларнинг шифохонага ётқизилишига ҳожат қолмаганини билдирган.
Дронлар ҳужуми сабабли Пулково аэропорти тахминан соат 23:00 дан 06:00 гача рейсларни қабул қилмаган ва жўнатмаган. “Фонтанка” нашрининг ёзишича, камида 20 та рейс бекор қилинган, яна 30 дан ортиғи кечиктирилган.
Украина ҳарбийлари бир ҳафтадан ортиқ вақтдан бери Ленинград вилоятига дронлар билан ҳужум қилмоқда. Зарбалар, жумладан, Россия нефть экспорти учун муҳим транспорт боғламаси бўлган Усть-Луга портига қаратилмоқда.
