Тошкент шаҳри ва Фарғона вилоятида синтетик гиёҳванд моддаларни сақлаб келаётган 3 нафар ёш қўлга олинди. Бу ҳақда Ички ишлар вазирлиги хабар берди.
Маълум бўлишича, Фарғона вилояти Марғилон шаҳрида 2003 йилда туғилган фуқаро ва унинг ҳамроҳи ҳуқуқ-тартибот органлари томонидан тўхтатилиб, текширувдан ўтказилган. Текширув жараёнида уларнинг ёнидан 4 бўлакка бўлинган, умумий вазни 14 грамм бўлган синтетик модда аниқланган.
Суриштирувлар давомида ушбу шахслар моддаларни Тошкент шаҳрида яшовчи танишидан олганини билдирган. Шундан сўнг тезкор тадбирлар давом эттирилиб, Тошкент шаҳри Яккасарой туманида ижарада яшовчи 2008 йилда туғилган шахснинг хонадони кўздан кечирилган. Натижада хонадондан икки турдаги, умумий вазни 120 граммдан ортиқ синтетик гиёҳванд моддалар, қадоқлаш учун махсус скотчлар ва 2 та электрон тарози топилган.
Шунингдек, ушбу шахснинг 2005 йилда туғилган шеригини Сергели туманидаги уйи ҳам кўздан кечирилган. У ердан ҳам 10 граммдан ортиқ синтетик гиёҳванд моддалар аниқланган.
Маълумотларга кўра, тадбир давомида мусодара қилинган моддаларнинг умумий вазни 148,94 граммни, қиймати эса тахминан 15 минг долларни ташкил этган.
Ҳозирда ҳолат юзасидан терговга қадар текширув ҳаракатлари олиб борилмоқда.
