Афғонистонда жорий йил 26 мартдан буён давом этаётган бир қатор табиий офатлар, жумладан, кучли ёмғирлар, сув тошқинлари, ер кўчкилари ва биноларнинг қулаши оқибатида камида 189 киши ҳалок бўлди. Бу ҳақда мамлакатнинг табиий офатларга қарши курашиш бошқармаси вакиллари маълум қилди.
Қайд этилишича, охирги икки кун ичида табиий офат қурбонлари камида 22 кишини ташкил этган, яна тўққиз киши жароҳатланган. Идора матбуот котиби ўринбосари Тож Муҳаммад Хематнинг сўзларига кўра, энг кўп ўлим ҳолатлари уйларнинг қулаши ва тошқин вақтида чўкиш билан боғлиқ.ъ
Табиий офатлар бир вақтнинг ўзида бир нечта вилоятларни, жумладан, Қобул, Парвон, Панжшер, Пактия, Пактика, Ғазни, Қандаҳор, Фароҳ, Бодғис, Балх, Сарипул, Фарёб, Бадахшон, Нангарҳор, Лағмон ва Кунарни қамраб олган.
Сўнгги икки кеча-кундуз ичида сув тошқинлари камида 123,5 акр қишлоқ хўжалиги ерларини вайрон қилган. 451 та уйга шикаст етган, улардан 48 таси бутунлай вайрон бўлган, 104 таси эса жиддий зарар кўрган.
БМТнинг Гуманитар масалаларни мувофиқлаштириш бошқармаси маълумотларига кўра, мамлакатдаги сўнгги сув тошқинлари ва кучли ёмғирлар оқибатида 73 мингдан ортиқ киши жабр кўрган. Афғонистоннинг аксарият ҳудудларида кучли ёғингарчилик ва тошқинлар ҳамон давом этмоқда.
