Ўзбекистон миллий терма жамоасининг собиқ бош мураббийи Темур Кападзе Индонезияга сафари чоғида мамлакатнинг энг оммабоп спорт телеканалларидан бири “Garuda”га интервью берди. 44 ёшли мутахассис унда терма жамоани тарк этишига оид ҳолатлар, Индонезия футболи ҳақидаги фикрлари ва мураббийлик фалсафаси ҳақида сўзлаб берди.
Кападзенинг айтишича, Ўзбекистон терма жамоасини Жаҳон чемпионатига маҳаллий мураббий олиб бориши кераклиги ҳақидаги мухлисларнинг фикри унга руҳий кўмак бўлган:
“Мухлислар мени доимо қўллаб-қувватлаб, изоҳларда маҳаллий мураббийлар жамоани мундиалга бошлаб бориши кераклигини ёзишди. Биз илк бор Жаҳон чемпионатига чиққандик, жамоага катта босим ёки ортиқча вазифа қўйилмаган эди. Мен мураббий сифатида турнир орқали катта тажриба тўплаган бўлардим, аммо мундиалда бизни нима кутаётганини ҳеч ким билмайди. Раҳбарият эса тажрибали мутахассисни жалб қилишни маъқул топди”, деди Кападзе.
Кападзенинг таъкидлашича, Фабио Каннаваро бош мураббий этиб тайинлангач, раҳбарият ундан янги мураббийга мослашиш жараёнида ёрдам беришини айтган:
“Агар Фабио жамоага мослашиб олса, мен бош мураббий сифатида фаолиятимни бошқа жойда давом эттиришга тайёр эканимни айтдим. Бу фикримни тўғри қабул қилишди ва қўллаб-қувватлашди”, дейди Кападзе.
Кападзе Индонезияга меҳмон сифатида таклиф қилинганини, бу сафар мураббийлик фаолияти билан боғлиқ эмаслигини айтди:
“Бу ерга келишим терма жамоага алоқадор эмас. Мураббий бўламанми ёки йўқ — бу бошқа масала. Бу сафар дам олиш ва мамлакат маданияти билан танишиш учун ажойиб имконият бўлди. 2007-йилги Осиё Кубогига тўрт мамлакат мезбонлик қилди. Бизнинг гуруҳ ўйинлари Малайзияда бўлган, Саудия Арабистонига қарши чорак финал эса Жакартада ўтказилганди. Ўша пайт биринчи марта ушбу шаҳарга келганман”, деди ўзбекистонлик мутахассис.
Темур Кападзе ўзининг мураббийлик қарашлари ҳақида ҳам сўзлаб берди:
“Футбол бежизга ‘миллионлар ўйини’ эмас. Унда ҳиссиёт, қувонч, ҳаяжон бор. Олимпия терма жамоасида ишлаган вақтимда Абдуқодир Ҳусанов, Аббосбек Файзуллаев каби футболчиларга ўз билимларимни улашишга ҳаракат қилдим. Улар бошқа клубларда ўйнашса-да, билганларимизни ўргатганмиз ва ҳозир уларнинг миллий терма жамоада ўйнаётганини кўриб, бу йўлда оз бўлса ҳам ҳиссамиз борлигидан фахрланамиз. 2024-йилги U-23 Осиё кубоги ярим финалида Индонезияга қарши баҳс олиб бордик. Бу бизнинг 3,5 йиллик фаолиятимиздаги энг муҳим беллашув эди. Чунки ўша ўйиндаги ғалаба бизга Олимпия ўйинлари йўлланмасини тақдим этарди. Стадионнинг 80 фоизи индонезиялик мухлислар билан тўлган, атмосфера бизга меҳмонда ўйнаётгандек таассурот қолдирган. Мухлислар 12-ўйинчи бўлиб жуда катта босим ўтказишди. Индонезия яхши қаршилик кўрсатди, лекин бу футбол ва биз ўша баҳсда ғалаба қозона олдик”, дейди Кападзе
Кападзенинг фикрича, муваффақиятга эришиш учун жамоада баланс бўлиши зарур:
“Менинг футбол фалсафам ҳужумкорликка асосланган: тўп назорати, тезлик, агрессия, прессинг ва рақибни чуқур ўрганиш. Замонавий футболда ўз вақтида ҳимояланиш ва ҳужум қилиш, футболчиларнинг бирдек ҳаракат қилиши жуда муҳим”, дейди Кападзе.
Шунингдек, 44 ёшли ўзбекистонлик мутахассис Пеп Гвардиола, Юрген Клопп ва Луис Энрике каби мутахассисларнинг иш услубини мунтазам ўрганиб боришини қўшимча қилди:
“Менга Пеп Гвардиола, Юрген Клопп ва Луис Энрике каби мутахассисларнинг иш услуби ёқади. Доим барқарор натижаларга эришаётган жамоаларнинг ўйинларини таҳлил қиламан: улар қандай қилиб бунга эришяпти, нималарга асосланишади. Буларни ўрганиб бормоқдаман. Замонавий футболда тенденциялар ва динамика тез ўзгармоқда”, дея сўзини якунлади Кападзе.
Маълумот учун, Темур Кападзе 2025-йилнинг январидан 6-октябригача Ўзбекистон миллий терма жамоасини бошқарган. Мутахассис бу давр ичида 9 та ўйинда жамоани майдонга бошлаб тушиб, 5 тасида ғалаба, 4 тасида эса дуранг натижасини қайд этган.
