Google платформасида АҚШ долларининг сўмга нисбатан курси қисқа вақт давомида 6 778 сўм сифатида хато акс эттирилди. Орадан бир оз вақт ўтиб курс 12 минг сўм атрофидаги ҳақиқий қийматига қайтди.
Марказий банк маълум қилишича, ушбу ҳолат халқаро платформадаги техник носозлик билан боғлиқ бўлган. Бошқа қидирув ва ахборот платформаларида валюта курси тўғри кўрсатилган.
“Маълумотлар акс этишида бундай хатоликлар вақти-вақти билан юз бериб туради ва регулятор учинчи шахслар ҳамда халқаро платформалар томонидан эълон қилинадиган ёки узатиладиган ахборот учун жавобгар ҳисобланмайди”, дея маълум қилди Марказий банк матбуот хизмати.
Қайд этилишича, учинчи томон платформаларида акс этган курслар асосида ҳеч қандай банк ёки молиявий амалиётларни амалга ошириб бўлмайди.
Регулятор валюта курси Марказий банк томонидан белгиланмаслиги, балки Республика валюта биржасидаги кунлик савдолар натижасида шаклланишини эслатиб ўтди. Курс ҳақидаги маълумотлар Марказий банк ва валюта биржаси расмий сайтлари ҳамда ижтимоий тармоқлардаги саҳифаларида мунтазам эълон қилиб келинмоқда.Маълумот учун, бугун, 30 январь куни Ўзбекистонда 1 АҚШ долларининг сўмга нисбатан расмий курси 12 199 сўмни ташкил этмоқда.
