Қимматбаҳо металлар нархининг кўтарилиши бозорнинг энг йирик иштирокчиларидан бири бўлган Россияга ҳам таъсир қилди. Натижада мамлакатнинг олтин-валюта захиралари 786,9 миллиард долларга етди. Бу федерация тарихидаги энг юқори кўрсаткич ҳисобланади.
Россия Марказий банкининг маълум қилишича, сўнгги бир ҳафта ичида захиралар 17,8 миллиард долларга ёки 2,3 фоизга ошган. Қайд этилишича, ўсиш асосан олтин нархининг кўтарилиши ҳисобига юз берган. Жумладан, ушбу қимматбаҳо металл нархи бир кунда 8,7 фоизга, охирги бир йилда эса 81,82 фоизга юқорилади.
Маълумотларга кўра, 2026 йил 1 январь ҳолатига Россиянинг олтин-валюта захиралари 754,9 миллиард долларни ташкил этган. Бир йил аввал худди шу даврда бу кўрсаткич 609,1 миллиард доллар эди. Шу тариқа, ўтган йил давомида мамлакат захиралари қарийб 25 фоизга ошган.
Жорий йил 1 январь ҳолатига кўра, Россия олтин-валюта захиралари таркибида монетар олтиннинг улуши 43 фоизни ёки 326,5 миллиард долларни ташкил этган. Бир йил аввал бу кўрсаткич 32 фоиз, аниқроқ айтганда, 195,7 миллиард доллар даражасида эди.
Шу билан бирга, Россия Марказий банки омборларидаги олтиннинг жисмоний ҳажми бир оз камайган. Ўтган йил якунига келиб захиралар 75 миллион трой унциядан 74,8 миллион трой унцияга тушган. Бу ҳолат Марказий банк томонидан бюджет камомадларини қоплаш учун олтин сотилгани билан изоҳланмоқда.
Бироқ Россия ушбу захиралардан эркин фойдалана олмайди. Боиси Украинага қарши кенг кўламли уруш бошланган 2022 йилдан сўнг мамлакатнинг Ғарб давлатларида сақланаётган тахминан 300 млрд долларлик активлари музлатилган. Бу маблағлар асосан хорижий банк ҳисоб рақамларида ва қимматли қоғозлар кўринишида сақланади. Россия бевосита тасарруф эта оладиган захираларининг асосий қисмини эса мамлакат ичкарисида сақланаётган жисмоний олтин ҳамда Хитой юани ташкил этади.
