Россия томони АҚШдан музлатилган активларидан 1 млрд долларини Ғазо секторини тиклаш учун Тинчлик кенгашига йўналтириш таклифига ҳали жавоб олмади. Бу ҳақда Россия президентининг матбуот котиби Дмитрий Песков маълум қилди.
“Бундай таклиф чиндан ҳам Россия президенти томонидан билдирилган эди. Биз ҳозирча бунга жавоб олмадик”, деди Песков.
Кремль матбуот котиби АҚШ билан бу мавзуда мулоқот олиб борилаётган-борилмаётгани ҳақидаги саволга ҳам жавоб берган.
“Тинчлик кенгаши мавзуси ҳамон Россия президентининг топшириғига биноан ташқи ишлар вазири томонидан иттифоқчиларимиз ва ҳамкорларимиз билан биргаликда пухта ўрганилмоқда”, деб таъкидлади Песков.
Январь ойида Владимир Путин Фаластин раҳбари Маҳмуд Аббос билан учрашувда Россия Федерациясининг Тинчлик кенгашига 1 миллиард доллар йўналтириш таклифи ҳақида ўз фикрларини билдирган.
“Эҳтимол, эшитгандирсиз, биз янги тузилма — Тинчлик кенгашига биринчи навбатда ва асосан Фаластин халқини қўллаб-қувватлаш, бу маблағларни Ғазо секторини тиклаш ва умуман Фаластин муаммоларини ҳал этишга йўналтириш учун миллиард доллар ажратишга тайёрмиз. Мен аввал ҳам айтганман, Қўшма Штатларда аввалги маъмурият даврида музлатиб қўйилган маблағлардан бу мақсадда фойдаланиш мумкин, деб ўйлайман”, деган Путин.
Дональд Трамп Россия ўз маблағларидан Ғазо бўйича тинчлик кенгашига 1 млрд доллар ажраца, бунга қаршилик қилмаслигини айтган.
- Ғазо бўйича “Тинчлик кенгаши”
“Тинчлик кенгаши” — Дональд Трамп томонидан илгари сурилган халқаро ташкилотдир. Швейцариянинг Давос шаҳрида 2026-йилнинг 22 январь куни ташкилот низоми қабул қилинди. Ўзбекистон президенти Шавкат Мирзиёев ва Қозоғистон президенти Қосим-Жўмарт Тўқаев ҳам ушбу кенгаш низомини имзолади. Жами 19 та давлат етакчилари Давосдаги мазкур тадбирда қатнашди. Кенгашга доимий аъзо бўлишни истаган давлатлар 1 миллиард доллар ихтиёрий бадал тўлаши лозим.
АҚШ маъмурияти ушбу маблағлар “Ғазони тиклашга йўналтирилишини” ваъда қилмоқда. Трампнинг куёви Жаред Кушнер Давосдаги йиғилишда Янги Ғазо бўйича режаларни эълон қилган. Унга кўра, келгуси 10 йил ичида (2035-йилгача) Ғазо ҳудудининг ялпи ички маҳсулоти 10 миллиард АҚШ долларидан ошади ва 500 мингдан ортиқ янги иш ўринлари яратилади. 5 миллиард АҚШ долларидан ортиқ маблағ замонавий ва ишончли коммунал инфратузилма ҳамда жамоат хизматларига йўналтирилади.
“Тинчлик кенгаши” низомига кўра, аъзо давлатлар етакчилари йилига бир марта АҚШ президенти раислигида йиғилади. Кенгаш раиси — яъни АҚШ президенти — уни бошқаришда мутлақ ваколатларга эга бўлади. У ҳар қандай қарорга вето қўйиши, шунингдек, кенгашга ким аъзо бўлиши ёки аъзоликдан четлатилишини белгилаши мумкин. Аъзо бўлинган вақтдан бошлаб давлатнинг кенгашдаги ваколат муддати уч йил этиб белгиланади. Агар 1 миллиард долларлик бадал тўланса, бу муддат узайтирилиши мумкин. Қозоғистон “Тинчлик кенгаши”га бадалсиз аъзо бўлган.
