АҚШ Афғонистонда яқинда жорий этилган жиноий кодекс туфайли Афғонистонга қарши санкцияларни кенгайтириши мумкин. Янги кодекс давлат дини — ҳанафий мазҳабидаги исломдан чекиниш учун жазолар белгилаган, деб хабар қилмоқда Afghanistan International янгиликлар портали.
Портал маълумотларига кўра, АҚШнинг Халқаро диний эркинлик бўйича комиссияси (USCIRF) АҚШ президенти ва давлат котибини Афғонистонни “алоҳида хавотир уйғотадиган мамлакат” сифатида тан олишга чақирган. Бу эса Қобулдаги ҳозирги режимга қарши кенгроқ санкциялар қўлланилишига йўл очиши мумкин.
USCIRF — 1998-йилда қабул қилинган Халқаро диний эркинлик тўғрисидаги қонун (International Religious Freedom Act, IRFA) асосида ташкил этилган АҚШ федерал ҳукуматининг комиссияси ҳисобланади.
Комиссия аъзоси Стивен Шнек Afghanistan International билан суҳбатда “Толибон” томонидан яқинда киритилган жиноят кодекси “чуқур хавотир уйғотаётгани” ва Афғонистондаги диний эркинлик ҳамда инсон ҳуқуқларига таҳдид солаётганини билдирган.
“Ҳужжат фақат ҳанафий мазҳабининг толиблар талқинини тан олади ва исломдаги бошқа динлар ҳамда оқимларни четга суриб қўяди”, дейди Шнек.
Шнекнинг таъкидлашича, “жиноят кодекси мухолифларни ўлдиришни оқлайди, амалда қулликни тан олади ва баъзи хатти-ҳаракатларни, жумладан рақсларни ҳам жиноий жавобгарликка тортади”. Бу эса, унинг фикрича, халқаро ҳуқуққа зиддир.
Афғонистон ҳукумати яқинда янги Жиноят кодексини тасдиқлади. Энди барча судлар шу кодекс асосида ишлайди. Портал маълумотларига кўра, ҳужжат ўлим жазосини, шунингдек, бошқа жуда оғир жазоларни назарда тутади.
Шнек Афғонистоннинг “алоҳида хавотирга молик давлат” деб тан олиниши толибларга қарши кенгроқ санкциялар жорий этилишига ёрдам бериши мумкинлигини қайд этган. У халқаро ҳамжамият Афғонистонда содир бўлаётган воқеаларга мувофиқлаштирилган ҳолда муносабат билдириши кераклигини қўшимча қилди.
“Толибон”нинг аёллар ва қизларга муносабати жиноят кодекси билан тасдиқланган бўлиб, қуллик шаклига тенг ва халқаро ҳуқуқнинг очиқдан-очиқ бузилиши ҳисобланади”, дейди USCIRF аъзоси.
