АҚШ президенти маъмурияти 75 та давлат, жумладан, Ўзбекистон фуқаролари учун иммиграцион визалар беришни тўхтатиб қўйганди. Мазкур қарор туфайли АҚШ Иммиграция гуруҳлари, адвокатлар ва фуқаролар коалицияси Давлат котиби Марко Рубио ва АҚШ Давлат департаментини судга берди. Бу ҳақда The Guardian хабар берди.
АҚШ президенти маъмурияти айрим давлатлар фуқароларига муҳожирлик ҳуқуқларини бермай, “улар келиб нафақа олади” деган “ёлғон даъво” билан иммиграция визаларини бермай қўйганликда айбланмоқда. Давлат департаменти январь ойида 75 та мамлакат фуқароларига иммиграцион визалар беришни тўхтатиб қўйганди.
“Давлат департаменти мигрантлари Америка халқи ҳисобидан қабул қилиб бўлмас даражада ижтимоий ёрдам олаётган 75 та давлатдан иммиграцион визаларни расмийлаштиришни вақтинча тўхтатмоқда. Ушбу тақиқ АҚШ янги келган иммигрантлар Америка халқининг бойлигини ўзлаштирмаслигига ишонч ҳосил қилмагунча ўз кучида қолади”, дейилган департамент баёнотида.
Шунингдек, ушбу қарор Сомали, Гаити, Эрон ва Эритрея каби давлатларни ҳам қамраб олиши айтилган. Баёнотда бу мамлакатлардан АҚШга келганлар кўпинча давлат зиммасига молиявий юк бўлиб қолиши таъкидланган.
Чеклов қўйилган давлатлар орасида Куба ҳам бор. Марко Рубионинг ота-онаси айнан шу давлатдан 1956-йилда ҳужжациз муҳожир сифатида АҚШга келган.
“Президент Трамп муҳожирлар молиявий жиҳатдан ўзини ўзи таъминлаши ва америкаликларга молиявий юк бўлмаслиги кераклигини айтди. Давлат департаменти ушбу юқори хавфли мамлакатлардан келган муҳожирлар Қўшма Штатлардаги ижтимоий таъминотдан фойдаланмаслиги ёки жамоатчилик масъулиятига айланмаслигини таъминлаш учун барча қоида ва кўрсатмаларни тўлиқ кўриб чиқмоқда”, дейилади Давлат департаменти сайтида.
Даъвода айтилишича, ушбу қарор деярли барча иммиграцион виза аризаларининг ярмига яқинини тўхтатиб қўйган.
Мигрантлар “жамоат зиммасига юк бўлиш” ҳақидаги даʻво асоссиз ва ёлғон, чунки бу мамлакатлардан келган муҳожирлар АҚШга ижтимоий нафақа олиш учун келади деган фикр исботланмаган. Кўплаб аризачилар пул кўринишидаги ижтимоий ёрдам олиш ҳуқуқига эга эмас ва улар йиллар давомида даъвогар бўла олмайди, дейилади даʻвода.
Адвокатлар Давлат департаменти АҚШнинг Иммиграция ва фуқаролик тўғрисидаги қонунига зид равишда, фақат миллатга қараб виза беришни рад этишга имкон берувчи ноқонуний тизим яратганини айтмоқда.
“Бу сиёсат ҳукумат ваколатидан ташқарига чиқади, конституцияни бузади”, деди Миллий иммиграция ҳуқуқи маркази адвокати Жоанна Чуэвас Инграм.
