Эстония ҳукумати Украинадаги ҳарбий ҳаракатларда иштирок этган 261 нафар Россия фуқаросига нисбатан мамлакатга кириш тақиқини жорий қилди ва бу фақат бошланиши эканини маълум қилди. Бу ҳақда мамлакат Ички ишлар вазирлиги баёнотига таяниб, Euronews хабар берди.
Вазирлик баёнотида Украинада ваҳшийликлар содир этганлар учун дунёда ўрин йўқлиги алоҳида таъкидланди.
“Хавф назарий эмас, балки реал”
Эстония бир неча ойдан бери бутун Европа Иттифоқи миқёсида россиялик уруш фахрийлари учун виза чекловларини жорий этишни ёқлаб келмоқда. Бу ташаббус Болтиқбўйи ва Скандинавия давлатлари томонидан қўллаб-қувватланган.
Эстония Ички ишлар вазирлиги ҳисоб-китобларига кўра, Россиянинг Украинага кенг кўламли босқинида 1,5 миллионгача россиялик иштирок этган бўлиб, уларнинг ярми бевосита фронт чизиғида хизмат қилган. Ички ишлар вазири Игор Таронинг сўзларига кўра, бундай шахслар яратадиган хавф “назарий эмас”.
“Улар жанговар тажриба ва ҳарбий тайёргарликка эга, шунингдек, кўпинча жиноий ўтмишга эга бўлиши мумкин”, дея қўшимча қилди вазир.
“Бу фақат бошланиши”
Тақиқ расман ўтган ҳафтада эълон қилинган, бироқ 12 январь куни ижтимоий тармоқлар орқали эълон қилинган.
“Бу фақат бошланиши. Биз бошқа давлатларни ҳам шундай йўл тутишга чақирамиз”, деб ёзди ташқи ишлар вазири Маркус Цаҳкна X тармоғида.
Мамлакат бош вазири Кристен Михал ҳам муносабат билдириб, шундай деди:
“Уруш жиноятлари учун жавобгарликни таъминлаш ва Европа хавфсизлигини ҳимоя қилиш адолатли ва мустаҳкам тинчлик учун зарурдир”.
Украина ташқи ишлар вазири Андрей Сибига ҳам ушбу қарорни олқишлаб, буни зарурий хавфсизлик чораси ва жазо муқаррарлиги ҳақидаги аниқ сигнал деб баҳолади.
БМТ ҳисоботи: “2025 йил — энг қонли йил”
Россиялик ҳарбийларга қўйилган ушбу тақиқ БМТнинг Украинадаги инсон ҳуқуқлари бўйича мониторинг миссияси эълон қилган ҳисобот билан бир вақтга тўғри келди.тўғри келди. Унга кўра, 2025-йилда Украинада тинч аҳоли учун Россия босқини бошланган 2022-йилдан буён энг ҳалокатли йил бўлган. Унга кўра,
камида 2 514 нафар тинч аҳоли ҳалок бўлган;
12 142 киши жароҳатланган;
қурбонлар сони 2024-йилга нисбатан 31 фоизга, 2023-йилга нисбатан эса 70 фоизга ошган.
Мониторинг миссияси раҳбари Даниэль Беллнинг сўзларига кўра, тасдиқланган талафотларнинг 97 фоизи Россия қуролли кучларининг Украина ҳукумати назоратидаги ҳудудларга берган зарбалари оқибатида содир бўлган. Бу ўсиш нафақат фронтдаги жангларнинг кучайиши, балки узоқ масофали қуролларнинг кенг қўлланилиши билан изоҳланмоқда.
