Ўзбекистонда криптовалюта хизматларини кўрсатувчи компаниялар учун лицензия олиш тартиби кучайтирилади. Тегишли ҳужжат Жамоатчилик муҳокамалари порталида эълон қилинди.
Бунда лицензияловчи орган томонидан қўлланиладиган, кўриб чиқилаётган масаланинг ҳақиқий мазмуни расмий мазмунидан устуворлигини назарда тутувчи профессионал баҳолаш жорий қилинади. Шу баҳолаш натижаси салбий бўлса, лицензия бериш рад этилиши мумкин.
Шу билан бирга, бозор иштирокчилари ва раҳбарларнинг ишбилармонлик обрўсига қўйиладиган талаблар ҳам кучайтирилди. Фақатгина суд ҳукмлари эмас, балки иқтисодий ҳуқуқбузарликларга алоқадорлик ҳақидаги маълумотлар ҳам рад этиш учун асос бўлиши мумкин.
Криптокомпаниялар шу турдаги активлар Ўзбекистонда тўлов ва тўловни қабул қилиш воситаси эмаслиги, давлат томонидан таъминланмаганлиги, бунда таваккалчилик мавжудлиги, техник носозликлар ва ноқонуний ҳаракатлар, шунингдек, талон-торож қилиш ҳолатлари ҳақида фуқароларни огоҳлантириши шарт бўлади.
