Ўзбекистон Фанлар академияси олимлари ҳаводаги зарарли газлар ҳамда сувдаги оғир металларни тозалаш имконини берувчи янги турдаги гибрид аэрогел ишлаб чиқди. Бу ҳақда академия ахборот хизмати хабар берди.
Маълум қилинишича, янги материал тузилманинг Умумий ва ноорганик кимё институти ҳамда Полимерлар кимёси ва физикаси институти олимлари ҳамкорлигида яратилган. Аэрогел нанотцеллюлоза асосида тайёрланган бўлиб, қайта тикланадиган ва экологик тоза хом ашё ҳисобланади.
Олимларнинг таъкидлашича, материалнинг ғовак тузилмаси ичига махсус металл-органик бирикмалар жойлаштирилган. Шу туфайли аэрогел ҳаводаги карбонат ангидрид (CО₂) газини ушлаб қолиш, шунингдек, сув таркибидаги оғир металл ионлари ва зарарли бўёқларни ўзига сингдириб олиш имкониятига эга.
Янги материал бошқа соҳаларда ҳам қўлланиши мумкин. Хусусан, у қурилишда самарали иссиқлик изоляцияси материали сифатида ишлатилади, паст иссиқлик ўтказувчанлиги сабаб биноларда энергия йўқотилишини камайтиради. Бундан ташқари, аэрогелнинг наноғовак тузилмаси товуш тўлқинларини ютиш хусусиятига эга бўлиб, биноларда акустик қулайликни таъминлайди.
Шунингдек, композит аэрогел механик таъсирларга нисбатан барқарор бўлиб, конструксион элементларнинг мустаҳкамлигини оширишга хизмат қилади. Материал жуда енгил бўлишига қарамай мустаҳкамлиги юқори ҳамда юқори ҳароратга чидамлилиги билан ажралиб туради.
