Афғонистондан олиб келинган қарийб 600 кг наркотик модда Термизда тўхтатиб қолинди. Бу ҳақда Давлат хавфсизлик хизмати хабар берди.
Маълум қилинишича, жиноий гуруҳ тонг саҳар вақтда ҳарбий хизматчилар сергакликни йўқотишига умид қилиб, наркотик моддани олиб ўтишни режалаштиришган. Бироқ ДХХнинг тезкор бўлинмалари ва Чегара қўшинлари ҳамда Божхона қўмитаси ҳамкорлигида ўтказилган тезкор қидирув тадбирлари натижасида бунинг олди олинган.
Афғонистондан Сурхондарё вилоятидаги “Термиз-авто” чегара божхона постига кириб келган Афғонистон фуқароси бошқарувидаги Мерседес русумли юк автомашинаси ўрнатилган тартибда текширувдан ўтказилган. Натижада автомашина тиркамасида олиб келинаётган Doosan русумли экскаватор инспексион кўрик мажмуаси орқали сканер қилинганида, унинг кўтаргич қисми (“стрела”) ичида конструкцияда кўрсатилмаган шубҳали предметлар борлиги кўринган.
Шундан сўнг, экскаватор туйнуклари эндоскоп махсус техник воситаси орқали кўздан кечирилганда, унинг кўтаргич қисмига 593 килограмм гашиш ва 3 килограмм опий гиёҳвандлик воситалари яширилгани аниқланган.
Ҳозирда ҳолат юзасидан Жиноят кодексининг 246 (контрабанда)ва 273-моддалари билан жиноят иши қўзғатилиб, ушбу наркотик моддалар эгаларини қўлга олиш чоралари кўрилмоқда.
