Тошкент вилояти Бўка тумани Солиқ инспекцияси бош инспектори 10 миллион сўм пора олаётганида ушланди. Бу ҳақда Давлат хавфсизлик хизмати хабар берди.
У ўз хизмат мавқейидан фойдаланган ҳолда, пахта ва ғалла етиштиришга ихтисослашган фермер хўжалик раҳбарининг ишончига кириб, мазкур хўжаликнинг солиқ органларидан мавжуд бўлган 165,6 миллион сўм миқдоридаги солиқ қарздорлигини тўлаш муддатини вилояти солиқ бошқармасидаги ҳамкасби орқали узайтириб бериш эвазига 10 миллион сўм талаб қилган.
Давлат хавфсизлик хизмати ва Бош прокуратура ҳузуридаги Департамент ходимлари ҳамкорлигида ўтказилган тезкор тадбирда у сўралган пул маблағини ўз хизмат хонасида олган вақтида ашёвий далиллар билан ушланган.
Ҳолат юзасидан бош инспекторга нисбатан Жиноят кодексининг 168-моддаси (фирибгарлик) 3-қисми “v” банди ва 28, 211-моддаси (пора бериш) 1-қисми билан жиноят иши қўзғатилиб, қамоқ эҳтиёт чораси қўлланди. Ҳозирда тергов ҳаракатлари олиб борилмоқда.
