Навоий ва Тошкент шаҳарларида қалбаки валюталарнинг муомалага киритилишига чек қўйилди. Бу ҳақда Давлат хавфсизлик хизмати хабар берди.
Навоий шаҳрида ДХХ ва Ички ишлар органлари ходимлари ҳамкорлигида ўтказилган тезкор тадбирда, Туркиядан Қирғизистон орқали Ўзбекистонга олиб келинган қалбаки АҚШ доллари савдоси билан шуғулланганлар қўлга олинди. Наманган шаҳрида яшовчи, 1984 йилда туғилган шахс ўзининг жиноий шериги бўлган 1972 йилда Жиззах вилоятида туғилган, ҳозирда Тошкент шаҳрида истиқомат қилувчи, муқаддам бир неча маротаба судланган фуқаро билан ўзаро тил бириктириб, 100 АҚШ доллари купюрадаги, қалбаки 19 900 АҚШ долларини харидорга 14 000 АҚШ долларига сотган вақтларида уларнинг ноқонуний ҳаракатларига чек қўйилган.
Қонунбузарларга нисбатан Жиноят кодексининг 176-моддаси 3-қисми “а” банди (ўтказиш мақсадида қалбаки банкнотлар, металл тангалар, акциз маркалар, шунингдек, қимматли қоғозлар ёхуд чет эл валютаси ёки чет эл валютасидаги қимматли қоғозлар ясаш ёки уларни ўтказиш такроран ёки хавфли ресидивист томонидан содир этилиши) билан жиноят иши қўзғатилиб, қамоқ эҳтиёт чораси қўлланилган.
Ушбу модда билан айбдор деб топилган шахслар 5 йилдан 10 йилгача озодликдан маҳрум қилиш билан жазоланади.
Тошкент шаҳрида қайд этилган ҳолатда эса Наманган вилоятининг Чуст туманида яшовчи, 1997 йилда туғилган шахс пойтахтлик фуқаронинг ишончига кириб, уни алдаб, қалбаки бўлган 100 АҚШ доллари купюрали 10 минг АҚШ доллари, 100 минг сўм купюрали 10 миллион сўм ва 50 минг сўм купюрали 5 миллион сўм пулларни ҳақиқий 5 500 АҚШ долларига сотишини айтган.
Давлат хавфсизлик хизматининг Тошкент шаҳар бўйича бошқармаси ва Иқтисодий жиноятларга қарши курашиш департаменти ходимлари томонидан пойтахт ҳудудида ўтказилган тезкор тадбирда, у пул воситаси ҳисобланмайдиган купюраларни 5 500 АҚШ долларига сотмоқчи бўлган вақтида ашёвий далиллар билан ушланган.
Ҳозирда унга нисбатан жиноят иши қўзғатилиб, тергов ҳаракатлари олиб борилмоқда.
