АҚШ шарқий Тинч океанида гиёҳванд моддаларни ташиётгани айтилаётган учта кемага зарба берди. Ҳужумлар оқибатида саккиз киши ҳалок бўлди. Бу ҳақда АҚШ Қуролли кучларининг Жанубий қўмондонлиги хабар берди .
Қайд этилишича, ҳужумлар оқибатида жами саккиз киши ҳалок бўлган: биринчи кемада уч киши, иккинчисида икки киши, учинчисида яна уч киши бўлган. Қўмондонлик хабарига кўра, кемалар халқаро сувларда зарба олган.
АҚШ Президенти Дональд Трамп Лотин Америкасидаги наркокартелларга қарши “жойида кураш” доирасида қуролли кучлардан кенг ва фаол фойдаланишни назарда тутувчи фармонни имзолаган эди.
Шу доирада АҚШ август охирида Венесуэла соҳилига сувости кемаси ва жанговар кемаларни ўз ичига олган денгиз гуруҳини юборган. Мудофаа вазири Пит Ҳегсет шу пайтда АҚШ Қуролли кучлари Венесуэла ҳудудида, жумладан, режимни ўзгартириш сценарийларини ҳам амалга оширишга тайёр эканини билдирган.
Шу билан бирга, АҚШ ҳарбийлари яқинда Кариб ҳавзаси ва Тинч океанидаги кемаларга наркотрафикни назорат қилиш номи остида ҳужум қилиши, шунингдек, кемаларда бўлган одамларга тўғридан-тўғри зарба бериши халқаро ҳамжамиятда “судсиз қатл” деб аталадиган масалалар бўйича мунозараларга сабаб бўлмоқда.
