Ўзбекистонга 2026 йил январ—февраль ойларида электромобиллар импорти олти баравар ошди. Бу ҳақдаги маълумот Божхона қўмитаси сайтида келтирилган.
Таҳлилга кўра, икки ойда мамлакатга жами қиймати 158,6 миллион долларлик 9 698 дона электромобиль импорт қилинган. 2025 йил мос даврида хориждан 18 миллион долларга 1 556 дона электрда ҳаракатланувчи автомобиллар сотиб олинганди. Бунда йиллик импорт қилинган электромобиллар сонидаги ўсиши қарийб олти бараварга етган.
Ўз навбатида бензинли автомобиллар импорти ҳам бир оз ортган. Хусусан, жорий йил январь—февралда чет элдан 55,95 миллион долларга 2 988 дона машина харид қилинган. Ўтган йил мос даврида 55,88 миллион долларга 2 746 дона автомобиль сотиб олинганди. Бунда сон жиҳатдан ўсиш кузатилган бўлса-да, қиймат деярли бир-бирига яқин шаклланган.
Январь—февралда гибрид автомобиллар импортида кескин ўсиш қайд этилган. Икки ой ичида хориждан 41,2 миллион долларга 1 249 та шундай машиналар сотиб олинган. Ўтган йилнинг мос даврида 2,1 миллион долларга бор-йўғи 70 дона гибрид автомобиль импорт қилинганди.
