“Манчестер Сити” Англия Лига Кубоги ярим финалида “Ньюкасл”га қарши баҳс олиб боради. Ушбу беллашув олдидан “шаҳарликлар” бош мураббийи Хосеп Гвардиола матбуот анжуманида иштирок этиб, ўзбекистонлик ҳимоячи Абдуқодир Ҳусанов ҳақида гапирди.
“Бу клуб тарихидаги энг яхши трансферлардан бири. Ҳусанов Францияда юқори даражада ўйнаб келганига қарамай, Англия Премьер Лигасига мослашиш осон эмас. Шунга қарамай, мен уни ўзига хос футболчи деб биламан. Унинг ўйин услуби бизникига жуда мос келади. Биз юқори прессинг билан ўйнаймиз ва у орқа зоналарни яхши ёпа олади. Умуман олганда, Абдуқодир бундай эпизодларни ёқтиради. Ҳозирги пайтда у жамоага катта ёрдам бермоқда. Тўп билан ишлаш қобилиятини босқичма-босқич ривожлантиришимиз керак. Ҳусанов ҳали жуда ёш, вақт ўтиши билан барчасини ўрганади. У ўрганишдан қочмайди, машғулотларга жиддий қарайди ва бор кучи билан ҳаракат қилади. Қисқа қилиб айтганда, Абдуқодир жуда ишончли футболчи”, дейди Пеп Гвардиола.
Шунингдек, испаниялик мутахассис “Манчестер Сити”нинг ўзбекистонлик футболчини харид қилгани энг тўғри қарорлардан бири бўлганини таъкидлади:
“Ўтган йили ҳам айтгандим, раҳбарият Ҳусанов борасида тўғри қарор қабул қилган. Сабаби дунёнинг энг кучли клублари ҳам уни ўз сафида кўришни истаган бўлар эди. Чунки унда ҳимоячи учун керак бўладиган барча ноёб сифатлар бор. Инглиз тилида ҳам анча яхши гаплаша олади, топшириқларни тез тушунади. У ўзи ўйлаганидан ҳам кучлироқ футболчи эканини англаб етиши керак: у узоқ масофага яхши узатма бера олади, чизиқларни ёриб ўтишда жуда зўр, тезлиги ҳам аъло даражада. Фақат бир оз дадилроқ бўлиши керак. У ҳали жуда ёш, шунинг учун буни камчиликларни тўғриласа бўлади. Қанча кўп ўйнаса, шунча тез ривожланади. Мен унга ишонишда давом этаман”, дея қўшимча қилди “Манчестер Сити” устози.
Маълумот учун, “Манчестер Сити” Англия Лига Кубоги ярим финалидан ўрин олган беллашувда “Ньюкасл”га қарши баҳс олиб боради. Учрашув 13 январдан 14 январга ўтар кечаси, соат 01:00 да бошланади.
