Европа Комиссияси, Интерпол ва кўплаб ташкилотлар сунъий интеллектнинг яланғочлаш воситаларини тақиқлашга чақирди. Бу ҳақда “Euronews” хабар берди.
“Amnesty International” ва Европа Комиссияси каби бир қатор йирик глобал ташкилотлар сунъий интеллектнинг яланғочлаш функциясини тақиқлашни талаб қилган. 100 дан ортиқ йирик гуманитар ва болаларни ҳимоя қилиш ташкилотлари сунъий интеллектни яланғочлаш иловалари ва воситаларига қарши шошилинч чоралар кўришга чақирган.
Бу ҳаракат Grok’га нисбатан норозиликлардан сўнг пайдо бўлган. Фойдаланувчилар Илон Маскнинг AI-чатботи Grok’дан аёлларнинг рақамли фотосуратларидан кийимларни олиб ташлашни сўраган. Кейин розиликсиз ва сохта суратлар миллионлаб одамлар кўриши учун Х ижтимоий медиа платформасида жойлаштирилган. Ҳозирга қадар Grok 3 миллионга яқин одамларнинг яланғоч суратларини яратган, деб тахмин қилинмоқда.
Сунъий интеллект воситалари томонидан яратилган суратлар кўпроқ шантаж, мажбурлаш ва болаларга нисбатан жинсий зўравонлик материаллари билан боғлиқ бўлиб, қурбонларнинг аксарияти аёллар ва болалар.
Глобал коалиция ушбу яланғочлаш иловалари ва воситалари болалар хавфсизлиги ва инсон қадр-қимматига жиддий ва қабул қилиб бўлмайдиган таҳдид туғдиришини айтмоқда.
“Яланғочлаш воситалари фарзандларимиз учун мисли кўрилмаган таҳдид яратди. Инсон салоҳиятини кенгайтириши керак бўлган технология – сунъий интеллект болаларга қарши қурол сифатида ишлатилмоқда. Биз зарарни “онлайн” деб аташ орқали минималлаштирамиз, гўё бу жисмоний дунёда содир бўладиган нарсаларга қараганда унчалик жиддий эмасдек, лекин травма ҳақиқий”, дейди “Safe Online” раҳбари Мария Манойлович.
Унинг айтишича, кўпинча катталар иловалари сифатида реклама қилинишига қарамай, улар тобора кўпроқ болаларнинг ҳеч қандай розилигисиз, самарали тўсиқларсиз ёки жавобгарликсиз ноқонуний жинсий расмларини яратиш учун фойдаланилмоқда. Технология компаниялари болаларнинг яланғочланган контентини аниқлаш ва блоклаш имкониятига эга. Болаларга нисбатан жинсий зўравонлик материалларини тарқатиш ҳар бир юрисдикцияда ноқонуний ҳисобланади ва технологик платформалар бошқа яратиш ва тарқатиш каналлари билан мослаштирилиши керак.
Сунъий интеллектнинг яланғочлаш технологияларини тақиқлаш бўйича босим кучайиб бормоқда. Ҳимоячилар улар ҳеч қандай яхши мақсадга хизмат қилмаслигини даъво қиляпти.
