Жорий йилнинг 26 октябрь куни Туркманистон Президенти Сердар Бердимуҳамедов “Йилнинг жасур туркман алабайи” унвонига сазовор бўлган алабай зотли ит ва унинг кинологига автомобиль совға қилди. Бу ҳақда “Jeyhun news” хабар берди.
Қайд этилишича, Туркманистонда “Йилнинг жасур туркман алабайи” танлови ўтказилган ва унда 10 дан ортиқ ит қатнашган. Танлов якунида мамлакат Мудофаа вазирлигининг Вепали лақабли ити ғолиб бўлган. Уни фахрий кинолог Оразмурат Сапаров ўстириб, вояга етказган ҳамда мусобақага тайёрлаган.
Халқаро танлов ғолибига Туркманистон Президентининг бош совғаси – Toyota Camry V6 русумли енгил автомобиль калити топширилган, шунингдек, у махсус медаль, кўчма кубок ва диплом билан мукофотланган.
“Кинолог қимматбаҳо совға ҳамда алабай зотининг асраб-авайлаш борасида давлат томонидан яратилган кенг имкониятлар учун ҳурматли Президентга самимий миннатдорлик билдирди”, дейилади хабарда.
