Тошкентнинг Олмазор тумани солиқ инспекцияси икки бош инспектори қамоққа олинди. Бу ҳақда 11 декабрь куни Давлат хавфсизлик хизмати хабар берди.
Маълум қилинишича, улар эшик ва ромлар ишлаб чиқарувчи оилавий корхонада текширув ўтказиб, гўёки корхона ҳар ойда кам миқдорда солиқ тўлаб келаётганини важ қилиб, тўланмаган солиқлар учун жарима қўлламаслик эвазига 10 миллион сўм талаб қилган.
Давлат хавфсизлик хизматининг Тошкент шаҳар бўйича бошқармаси ҳамда Иқтисодий жиноятларга қарши курашиш департаменти ҳамкорлигида ўтказилган тезкор тадбирда солиқчилар сўралган пул маблағини олган вақтида ашёвий далиллар билан ушланган.
Ҳозирда уларга нисбатан Жиноят кодексининг 210-моддаси (пора олиш) 2-қисми “v”, “г” бандлари билан жиноят иши қўзғатилиб, қамоқ эҳтиёт чораси қўлланди. Тергов ҳаракатлари олиб борилмоқда.
Кодексга кўра, пора олиш тамагирлик йўли билан бир гуруҳ мансабдор шахслар томонидан олдиндан тил бириктириб содир этилган бўлса, 5 йилдан 10 йилгача озодликдан маҳрум қилиш билан жазоланади.
