Андижон вилоятида маст ҳолатда автомобиль бошқариб ЙТҲ содир этгани айтилган профилактика инспектори ҳодисадан икки кун олдин ишдан олинган бўлиб чиқди.
Ҳайдовчи Nexia-3 автомашинаси билан скутерчисини уриб юборгани ҳақида видео тарқалиб, кенг муҳокамаларга сабаб бўлганди. Андижон вилояти ИИБнинг билдиришича, 9 ноябрь куни соат 18:30 ларда С.А. ўзига тегишли Nexia-3’ни Шаҳрихон тумани, “Назармахрам” МФЙ ўрамидан ўтган маҳаллий транспорт қатнов йўлида ҳайдаб кетаётганида, бошқарувни йўқотиши оқибатида қарама-қарши йўналишга ўтиб кетган. Натижада шу йўналишда ҳаракатланаётган скутерчи ҳайдовчи 1972 йилда туғилган Ж.М.ни автомашинанинг олд чап бурчаги билан уриб юборган.
Бунинг оқибатида фуқаро Ж.М. тан жароҳати олиб шифохонага ётқизилган. Ҳодиса сабабли автомашина ва скутер техник шикастланган.
Расмий хабарга кўра, Шаҳрихон тумани ИИБда профилактика катта инспектори лавозимида ишлаган С.А. ЙТҲдан икки кун олдин, Андижон вилояти ИИБнинг 2025 йил 7 ноябрдаги шахсий таркиб бўйича тегишли буйруғига асосан ички ишлар органлари тизимидан қуролли кучлар заҳирасига бўшатилган.
Ҳозирда мазкур ҳолат юзасидан Шаҳрихон тумани прокуратураси томонидан терговга қадар текширув ҳаракатлари олиб борилмоқда.
