Португалия терма жамоаси Ирландияга 0:2 ҳисобида мағлуб бўлган учрашувда Криштиану Роналду терма жамоа сафидаги илк қизил карточкасини олди. Бу ҳолат сабаб Роналдунинг Жаҳон чемпионатининг дастлабки учрашувларини ўтказиб юбориши мумкин. Бу ҳақда ESPN нашри хабар берди.
Кеча, 13 ноябрь оқшомида Португалия терма жамоаси Ирландия билан баҳс олиб борди. Учрашувнинг 61-дақиқасида Роналду Ирландия ҳимоячиси Дара О’Шига қарши қўполлик ишлатгани учун ҳакам томонидан дастлаб сариқ карточка кўрсатилди, бироқ VAR тавсияси билан монитор орқали эпизодни қайта кўриб чиқиб, қарорни қизил карточкага ўзгартирди.
FIFA интизом кодексига кўра, бундай эпизодлар учун камида 1 та ўйин, агар қўполлик жиддийроқ баҳоланса, 2–3 та ўйинга дисквалификация берилиши мумкин. Бу эса Роналдунинг 2026 йилги Жаҳон чемпионатининг ҳеч бўлмаганда биринчи ўйинини ўтказиб юбориш эҳтимолини оширади.
Португалия бош мураббийи Роберто Мартинес ҳакамнинг бу қарорини ҳаддан ташқари қаттиқ деб баҳолади:
“Бу 226 ўйинда бирор марта ҳам четлатилмаган сардоримиз. Мен эпизод аслида кўринганидан хавфли деб ўйламайман. Бурчак камера уни тирсакдек кўрсатди, лекин бу тирсак эмас эди”, дейди Мартинес.
Португалия саралашда ҳали ҳам “Ф” гуруҳида Венгриядан икки очколик фарқ билан пешқадамлик қилмоқда. Жамоа жорий йилнинг 16 ноябрь куни ўз майдонида Арманистон билан тўқнаш келади. Ушбу баҳсдаги ғалаба Роналдуга ўзининг олтинчи Жаҳон чемпионатига йўл олиш имконини беради.
