Кеча, 18 ноябрь куни Ўзбекистон миллий терма жамоаси БААнинг Ал-Айн шаҳрида ўтказилган халқаро ўртоқлик турнири ғолибига айланди. Эронга қарши пенальтилар сериясидаги ғалабадан сўнг Ўзбекистон терма жамоаси бош мураббийи Фабио Каннаваро ўз фикрлари билан ўртоқлашди.
More stories“Ғалаба қозониш ҳар доим ёқимли, футболчилар, мухлислар хурсанд. Эронга қарши ўйин осон бўлмади. Ҳар доим курашиш керак. Эрон жуда кучли, уларга қарши ўйинда бўшашиб бўлмайди. Биринчи таймда ўйинни назорат қилдик, жуда яхши ўйнадик. Учта яхши имкониятдан фойдалана олмадик. Иккинчи таймда гол уролмадик, ўйин пенальтилар сериясигача борди. Рақиб дарвозамиз олдида имконият яратмади. Албатта қизил карточкадан кейин ўйин қийинлашди. Футболчиларимнинг менталитетидан хурсандман. Бир ўйинчи кам бўлсак ҳам, рақибга ҳеч қандай имконият бермадик”, дейди мураббий ўйиндан кейинги матбуот анжуманида.
Шунингдек, Каннаваро терма жамоага жалб қилинган янги ошпаз ва нутрициолог ҳақида ҳам тўхталиб ўтди.
“У, албатта, бизга ёрдам беради. Овқатнинг сифати майда нарса бўлиши мумкин, аммо кейинчалик яхши натижаларга олиб келади. Аммо нутрициолог келгани учун ғалаба қозондик деб айтолмайман”, дея изоҳ берди Каннаваро.
Каннаваро терма жамоанинг пенальтилар сериясидаги муваффақияти ҳақидаги саволларга ҳам жавоб берди.
“Пенальтилар бўйича машғулот қилдик ва қайси ўйинчилар яхши тепишини аниқлаб олдим, шунга қараб танладим. Аммо пенальтилар баъзан яхши, баъзан ёмон натижа билан тугайди. Бугун пенальтилар бўйича Эрондан яхшироқ бўлдик ва биз кубокни уйга олиб кетамиз”, дейди мураббий.
