Эронлик тажрибали ҳимоячи Муртазо Пуралиганжи «Пахтакор» билан йил охиригача мўлжалланган шартнома имзолади. Бу ҳақида клуб матбуот хизмати хабар қилди.
34 ёшли ҳимоячи фаолияти давомида Эроннинг «Нафт» ва «Персеполис», Хитойнинг «Тианжин» ва «Шенжен», Қатарнинг «Садд» ва «Араби», Бельгиянинг «Юпен» клубларида ўйнаган. Клублар сафида 300га яқин ўйинларда майдонга тушган.
Эрон терма жамоаси сафида эса 54 та ўйинда майдонга тушиб, 3 та гол муаллифига айланган. У 2018 ва 2022-йилги жаҳон чемпионати финал босқичларида терма жамоа сафида асосий футболчи сифатида иштирок этган.
Муртазо Пуралиганжи «Пахтакор» жамоасига «Персеполис»дан эркин агент мақомида келиб қўшилди.
