Технология ва терроризмга қарши кураш бўйича дунёнинг етакчи мутахассислари сунъий интеллект (СИ) хавфсизлиги масалаларини муҳокама қилиш учун йиғилди. Улар СИ ёрдамида экстремист гуруҳлар томонидан атайин яратилган, глобал пандемияни келтириб чиқариши мумкин бўлган биологик қурол — энтеровирус штамми ҳақидаги гипотетик сценарийни кўриб чиқди. Бу ҳақда Euronews хабар берди.
Бу сценарий илмий-фантастик роман сюжетига ўхшаб туюлиши мумкин, аммо СИ хавфсизлигини муҳокама қилиш учун йиғилган 14 нафар экспертга кўра, бу хавф яқин йилларда тўлиқ амалга ошиши мумкин бўлган ҳолатдир. Мутахассислар гуруҳининг муҳокамалари бўйича тузилган ҳисоботга кўра, бутун дунё бўйлаб 850 миллион киши касалланиши ва 60 миллионта ўлим қайд этилиши мумкин.
СИ — катта имконият, катта хавф
Сунъий интеллект аллақачон тиббиёт соҳасида инқилоб яратиб, янги дорилар ва вакциналарни ишлаб чиқишда мутахассисларга кўмаклашмоқда. Бироқ экспертлар СИ қувватига эга биологик қурол инсониятга ҳалокат келтириши мумкинлигидан ҳам хавотир билдирмоқда.
Февраль ойида “Ядровий таҳдид ташаббуси” ва “Мюнхен хавфсизлик конференцияси” томонидан чақирилган экспертлар гуруҳи, СИнинг жадал ривожланиши ёвуз ниятли одамларга биологик қурол ишлаб чиқаришда ёрдам беришидан хавотир билдирган.
Гуруҳ хулосасига кўра, бу хавф узоқ келажакда эмас, балки яқин кунларда содир бўлиши мумкин. Мавжуд ва пайдо бўлаётган СИ асосидаги биологик воситалардан пандемия даражасидаги хавфга эга янги патогенларни яратиш техник жиҳатдан мумкин. Энг ёмони, гуруҳнинг таъкидлашича, амалдаги хавфсизлик чоралари бу таҳдидларга қарши курашишга тайёр эмас.
Таклиф этилган чоралар
Мутахассислар глобал етакчиларни СИ асосидаги биологик таҳдидларни баҳолаш ва уларга жавоб бериш учун кўпроқ ҳамкорлик қилишга чақирмоқда. Шунингдек, улар СИ хавфларини бошқариш бўйича саъй-ҳаракатлар ушбу технологияларнинг потенциал фойдалари билан мувозанатлашиши кераклигини, яъни илмий инновацияларга ортиқча чекловлар қўйишдан қочиш лозимлигини таъкидламоқда.
