АҚШ президенти Дональд Трамп Жанубий Корея учун автомобиллар, ёғоч ва фармацевтика маҳсулотларига божлар 15 дан 25 фоизгача оширилишини эълон қилди.
Бу қарор Жанубий Корея парламенти 2025-йилда тузилган савдо келишувини маъқулламагани билан изоҳланди. Янги божлар Жанубий Корея автомобиллари, ёғоч ва фармацевтика маҳсулотлари, шунингдек, икки давлат ўртасидаги бошқа савдо товарларига ҳам татбиқ этилади.
“Америка учун савдо келишувлари жуда муҳим. Ушбу келишувларнинг ҳар бирида биз шартномага мувофиқ божларни камайтиришга тезда ҳаракат қилдик. Биз, албатта, савдо ҳамкорларимиз ҳам шундай йўл тутишларини кутамиз.
Жанубий Корея парламенти АҚШ билан келишувни бажармаяпти. Президент Ли ва мен 2025 йил 30 июлда икки давлат учун ажойиб келишувга эришдик ва бу шартларни 2025 йил 29 октябрда Кореяда бўлганимда тасдиқладик. Нега Корея парламенти буни ҳалигача маъқулламади?”, деб ёзди АҚШ президенти Truth Social ижтимоий тармоғида.
Трамп “Жанубий Корея парламенти бизнинг тарихий савдо келишувимизни қабул қилмагани — уларнинг ҳуқуқи”, деди ва унинг таъкидлашича, шу сабабли АҚШ ушбу мамлакатдан олиб кириладиган маҳсулотларга божларни оширмоқда.
Жанубий Корея ҳукумати божлар оширилиши ҳақида расмий огоҳлантириш олмаганини маълум қилди ва Вашингтон билан зудлик билан музокаралар ўтказишга тайёрлигини билдирди.
Икки давлат ўртасидаги савдо келишувига кўра, Жанубий Корея АҚШ иқтисодиётига 350 миллиард доллар инвестиция киритиш мажбуриятини олганди. Ушбу маблағларнинг бир қисми кема қуриш соҳасига йўналтирилиши керак эди. Мазкур ҳужжат 26 ноябрь куни Жанубий Корея Миллий ассамблеясига киритилган ва ҳозирда кўриб чиқилмоқда. У февраль ойида тасдиқланиши мумкин.
2025-йилда Жанубий Кореянинг экспорти рекорд даражага — 709,4 миллиард долларга етди, бу 2024-йилга нисбатан 3,8 фоизга кўп. АҚШга йўналтирилган экспорт эса 122,9 миллиард долларни ташкил этди. Бу кўрсаткич 3,8 фоизга камайган, бироқ шунга қарамай, АҚШ Хитойдан кейин Жанубий Кореянинг иккинчи йирик экспорт бозори бўлиб қолмоқда. АҚШ асосан Жанубий Кореядан автомобиллар, уларнинг қисмлари, яримўтказгичлар ва электроника маҳсулотларини импорт қилади.
Маълумот ўрнида, Трамп 24 январь куни Канада Хитой билан савдо келишуви тузса, ушбу мамлакатдан олиб кириладиган барча маҳсулотларга 100 фоизлик бож жорий этилишини айтганди.
