Тошкент шаҳри Сергели туманида навбатдаги нарколаборатория фош этилди. Бу ҳақда Ички ишлар вазирлиги хабар берди.
Маълум бўлишича, ўтказилган тезкор тадбирда Юнусобод туманида жойлашган наркодўконда омборчи лавозимида ишлаб келганлар тезкор тадбир ходимларидан қочаётган пайтда ушланган. Шундан сўнг, ушбу жиноий гуруҳнинг ташкилотчиларини қўлга олишга қаратилган тезкор тадбир давом эттирилган.
Қайд этилишича, 3 нафар эркак ва бир нафар аёлдан иборат уюшган жиноий гуруҳ ижарада яшаб келган уйида кучли таъсир қилувчи моддаларни қадоқлашга мўлжалланган нарколаборатория фаолияти билан шуғулланиб келгани аниқланган. Уларнинг хонадонидан 10 кг кукунсимон “пригабалин”, 1 кг “тропикомед”, 5 литр суюқ ҳолатдаги “тропикомед”, шунингдек тайёр ҳолатдаги 5130 дона “пригабалин” ва 75 дона “тропикомед” кучли таъсир қилувчи дори воситалари ҳамда 50 000 та бўш капсулалар ва 10 000 та бўш флаконлар аниқланган.
Ушбу жиноий гуруҳ Telegram наркодўконда куратор топшириқларига асосан прекурсорларни қабул қилиш ва кучли таъсир қилувчи дори воситаларини тайёрлаш билан шуғулланган.
Мазкур ҳолат юзасидан ушбу жиноий гуруҳга нисбатан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) 5-қисми билан жиноят иши қўзғатилган.
