Наманган шаҳрида маст ҳолда бегона аёлнинг хонадонига кириб, унга шилқимлик қилган эркак 10 суткага қамалди.
Аниқланишича, 1992-йилда Уйчи туманида туғилган Н.З. 2026 йил 22 январь куни соат 20:00 ларда маст ҳолда Давлатобод туманида жойлашган кўп қаватли уйлардаги хонадонлардан бирининг эшигини тақиллатиб, тепиб, шовқин кўтарган. Шунингдек, хонадон эгаси А.Н. эшикни очган вақтида рухсатсиз уй ичига кириб, аёлни қучоқлаб олиб, шаҳвоний шилқимлик қилган.
Бундан ташқари, аёлнинг чақирувига асосан етиб келган ички ишлар органлари ходимларининг қонуний талабларига бўйсунмасдан, жамоат жойида бақир-чақир қилиб, майда безорилик ҳаракатларини содир этган.
Жиноят ишлари бўйича Наманган шаҳар суди Н.З.ни Маъмурий жавобгарлик тўғрисидаги кодекснинг 41-1 -моддаси (шаҳвоний шилқимлик қилиш), 45-моддаси (фуқароларнинг турар жойи дахлсизлигини бузиш), 183-моддаси (майда безорилик) ва 194-моддаси 1-қисмида (ички ишлар органлари ходимининг қонуний талабларини бажармаслик) назарда тутилган ҳуқуқбузарликни содир этган деб топган. Унга нисбатан Маъмурий жавобгарлик тўғрисидаги кодекснинг 34-моддаси тартибида 10 сутка маъмурий қамоқ жазоси ҳамда базавий ҳисоблаш миқдорининг 6 баравари миқдорида, яъни 2,4 миллион сўмдан ортиқ жарима жазоси тайинланган.
