Наманган вилояти Поп туманида кўчада аёлга шаҳвоний шилқимлик қилиб, сўнг унинг қўшнисига туҳмат қилган шахс жавобгарликка тортилди.
Судда аниқланишича, 1999-йилда туғилган А.А. 2025-йилнинг 17 сентябрь куни фуқаро У.Э.нинг Поп тумани “Истиқлол” маҳалласига бориб, учрашувга чақирган. У.Э. кўчага чиққанида А.А. аёлнинг гўзаллигини этикага тўғри келмайдиган тарзда таърифлаб, бирга кетишни сўраган ва турли уяциз сўзлар билан шаҳвоний шилқимлик қилган.
Аёл бу гапларга рози бўлмай, ундан кетишини талаб қилганида А.А. аёлнинг қўшниси Ф.Э. ҳақида уйдирма гапларни айтиб, унга туҳмат қилган.
Айбланувчи судда ўз айбини тан олиб, қилмишидан пушаймонлигини билдирди.
Жиноят ишлари бўйича Поп туман суди А.А.ни Маъмурий жавобгарлик тўғрисидаги кодекснинг 40-моддаси (туҳмат) ва 41-1-моддаси 1-қисмида (шаҳвоний шилқимлик қилиш) назарда тутилган ҳуқуқбузарликларни содир этган деб топди. Суд унга нисбатан, 5 сутка маъмурий қамоқ ҳамда базавий ҳисоблаш миқдорининг 20 баравари миқдорида, яъни 8,2 миллион сўм жарима жазоси тайинлади.
Аввалроқ шунга ўхшаш ҳолат Тошкент шаҳрида ҳам содир бўлгани ҳақида ёзгандик. 18 ёшли йигит ўзига нотаниш бўлган қизга шаҳвоний ҳаракатларни содир этгани учун 5 суткага қамалганди. У 30 ноябрь куни соат 01:10 ларда Сирғали туманидаги кўп қаватли уйларнинг лифт қисмида фуқаро М.К.га “инглиз тилида” гаплаша оласанми деб сўраган. М.К. унга рад деб жавоб берганига қарамасдан, уни таъқиб қилиб, унга нисбатан шаҳвоний хусусиятга эга бўлган ҳаракатларни содир этган.
