АҚШ Президентининг элчиси Стив Уиткофф Россия ва Украина иштирокидаги кейинги музокаралар келгуси уч ҳафта ичида бўлиб ўтиши мумкинлигини айтди.
Унинг таъкидлашича, музокараларнинг натижалари Россия Президенти Владимир Путин ва Украина Президенти Владимир Зеленский ўртасидаги учрашувга олиб келиши мумкин.
«Жаред Кушнер ва мен умид қиламанки, биз иккала томонга ҳам кейинги уч ҳафта ичида ҳатто Зеленский ва Путин ўртасидаги саммитга олиб келадиган баъзи таклифларни тақдим этдик», деди Уиткофф Fox News телеканалида.
Стив Уиткофф агар саммит бўлиб ўтса, АҚШ Президенти Доналд Трамп ҳам Владимир Путин ва Владимир Зеленский ўртасидаги музокараларда иштирок этиши мумкинлигини истисно қилмади.
Россия, АҚШ ва Украина ўртасидаги уч томонлама музокараларнинг учинчи босқичи 17 ва 18 феврал кунлари Женевада бўлиб ўтди. Россия делегацияси раҳбари Владимир Мединский музокараларнинг тўртинчи босқичи яқин орада бўлиб ўтишини айтди. ТАСС ўз манбасига таяниб, учрашув 1 мартгача бўлиб ўтиши мумкинлигини хабар қилди.
CNN телеканалининг хабар беришича, томонлар сулҳ қандай ишлашини аниқлашда «аста-секин, аммо сезиларли ютуқларга» эришдилар. Владимир Зеленский Украина делегациясига Владимир Путин билан мумкин бўлган учрашувни муҳокама қилишни буюрганини хабар қилди.
