Самарқанд шаҳрида ички ишлар ходимлари онлайн қимор ўйновчиларга хизмат кўрсатган тўрт нафар йигитни ҳибсга олди. Бу ҳақда 16 март куни ИИВ хабар берди.
Гуруҳ аъзолари 1998, 2000, 2003 ва 2004 йилда туғилгани маълум қилинган. Улар Paynet шохобчасида қимор ва таваккалчиликка асосланган онлайн ўйинларда иштирок этаётганларга хизмат кўрсатиб келган.
“2025 йилнинг декабрь ойида шу турдаги ҳуқуқбузарлик содир этганликлари учун қўлланган маъмурий жазодан тегишли хулоса чиқармасдан, яширин равишда ушбу қилмишларини давом эттириб келган”, дея ҳолатга таъриф берган манба.
Йигитлар қамоққа олинган жойдан 43,5 миллион сўм ва 4300 доллар топилган. Яна телефонлар, ноутбук, пластик карталар ва касса аппарати ҳам бўлган. Ички ишлар ходимлари уларни далилий ашё сифатида ўзлари билан олиб кетган.
Воқеа жойига онлайн қимор ўйнаш учун ҳисобини тўлдиришга борган 18 киши ҳам ҳибсга олинган. Ҳолат юзасидан Жиноят кодексининг 278-моддаси 1-қисми билан жиноят иши қўзғатилган.
Ўзбекистонда қимор ва таваккалчиликка асосланган ўйинларни қонунга хилоф равишда ташкил этиш ёки ўтказиш 7 йилдан 10 йилгача озодликдан маҳрум қилиш билан жазоланади.
