“Одиссея” фильмининг касса йиғимлари режиссёр Кристофер Нолан фаолиятидаги энг юқориси бўлди.
Тўрт дам олиш куни давомида картина 1,1 млрд доллардан ортиқ маблағ тўплади: шундан 461,1 млн доллари Шимолий Америкада ва 643,6 млн доллари дунёнинг қолган қисмида. “Одиссея” шунингдек, Метт Деймон, Энн Ҳетеуэй ва Роберт Паттинсоннинг фаолиятидаги энг кассабоп фильмга айланди.
Бундан аввал Ноланнинг энг кассабоп ленталари “Қора рицар” фильми (1,008 млрд доллар) ва унинг давоми – “Қора рицар: Афсонанинг юксалиши” (1,08 млрд доллар) бўлган эди. Ноланнинг барча фильмларидан тушган умумий даромад 7 млрд доллардан ошди.
“Одиссея” йил бошидан буён 1 млрд долларлик маррани забт этган бешинчи фильм бўлди. Улар қаторида “Супер Марио: Галактика киноси” (1,01 млрд доллар), “Майкл” номли баёпик (1,016 млрд доллар) ва “Ўйинчоқлар тарихи 5” (1,09 млрд доллар) бор. Айни пайтда 2026-йилнинг энг кассабоп фильми 1,26 млрд доллардан ортиқ йиғим билан “Ўргимчак одам: Янги кун” бўлиб турибди.
“Одиссея” жаҳон прокатига 17 июль куни чиқди. Гомер достонига асосланган картинада Одиссейнинг Троя урушидан сўнг уйига қайтиши ҳақида ҳикоя қилинади.
Картинада Метт Деймон (Одиссей), Энн Ҳетеуэй (Пенелопа, Одиссейнинг рафиқаси), Том Ҳолланд (Телемах), Роберт Паттинсон (Антиной), Эллиот Пейж (Синон), Лупита Нионго (Гўзал Елена), Зендея (маъбуда Афина), Шарлиз Терон (нимфа Калипсо), Бенни Сефди (Агамемнон) ва Миа Гот (Меланфо) рол ижро этган.
