Ўзбекистоннинг уч вилоятида ҳуқуқ-тартибот органлари пора олаётганда қўлга тушган ходимларни ушлаб, уларга нисбатан жиноят ишлари қўзғатди. Бу ҳақда ИИВ Жамоат хавфсизлиги департаменти матбуот хизмати хабар берди.
Маълумотга кўра, биринчи ҳолат Тошкент вилоятида қайд этилган. У ерда ИИВнинг Карантин тадбирларини таъминлаш гуруҳи ходими истеъмолга яроқсиз гўштни олиб киришга уринаётган эркакка чора кўрмаслик эвазига 500 АҚШ доллар талаб қилади. Пулни олаётган пайтда у қўлга олинган ва унга нисбатан Жиноят кодексининг 210-моддаси 2-қисми “в” банди (пора олиш) бўйича жиноят иши қўзғатилган. У тизимдан бўшатилган ва қамоққа олинган.
Иккинчи ҳолат Самарқанд вилоятида содир бўлган. Пастдарғом тумани ИИБ профилактика инспектори иш юритувидаги ҳужжатлар бўйича фуқарога чора кўрмаслик эвазига 800 доллар олаётганда қўлга олинган. Ходим лавозимидан озод этилган ва Жиноят кодексининг 168-моддаси (Фирибгарлик) 3 қисми “а” банди ва 211 (Пора бериш) моддаси 1-қисми билан жиноят иши қўзғатилиб, ходимга нисбатан қамоққа олиш эҳтиёт чораси қўлланилган.
Наманган вилояти Давлатобод туманида эса ИИБ патруль-пост хизмати ходими фуқаронинг автомобилида гиёҳванд моддаси топилгач, тегишли чораларни кўрмаслик эвазига 11 миллион сўмлик тилла тақинчоқларни пора сифатида олаётганда қўлга олинган. У ҳам ишдан бўшатилган. Ҳозирда тўпланган материаллар асосида терговга қадар текширув олиб борилмоқда.
Таъкидланишича, 2025 йил бошидан бери ҳуқуқ-тартибот органлари деярли 60 нафар инсофсиз ходимга нисбатан тезкор тадбирлар ўтказган. Натижада 250 нафар ходим орасида эҳтимолий ҳуқуқбузарликларнинг олди олинган. 300 дан ортиқ ходим бўйича пора таклифи билан боғлиқ ҳолатлар бўйича тезкор чоралар кўрилган: 557 нафар раҳбар ва ходим интизомий жазога тортилган, 479 нафари эса тизимдан бўшатилган.
