Ҳукумат қарори билан автотранспорт воситаларидан чиқариладиган ифлослантирувчи моддалар миқдорининг меъёрларга мослигини аниқлаш, экологик тоифаларга ажратиш ҳамда экологик стикерларни бериш тартиби белгиланди.
Низомга кўра, транспорт воситасининг экологик тоифаси унинг ишлаб чиқарувчи томонидан тасдиқланган экологик синфига мувофиқ белгиланади. Транспорт воситалари қуйидаги мезонлар асосида экологик тоифаларга ажратилади:
Бензин, сиқилган ва суюлтирилган газда ҳаракатланувчи транспорт воситалари:
- “Евро-2” ва ундан юқори экологик синф — “тоза” экологик тоифа;
- “Евро-0” ва “Евро-1” синф — “ўрта” экологик тоифа.
Дизель ёқилғисида ҳаракатланувчи транспорт воситалари:
- “Евро-4” ва ундан юқори экологик синф — “тоза” экологик тоифа;
- “Евро-3” синф — “ўрта” экологик тоифа;
- “Евро-0”, “Евро-1”, “Евро-2” синф — “зарарли” экологик тоифа.
Гибрид автомобиллар, муқобил ёқилғида ишловчи транспорт воситалари ҳамда ишлаб чиқарилганига 3 йилдан ошмаган транспорт воситалари — “тоза” экологик тоифага киради.
Транспорт воситаларини рўйхатга олиш ёки қайта рўйхатга олиш жараёнида уларга тоифасига мос равишда “яшил”, “сариқ” ёки “қизил” рангли экологик стикерлар Давлат йўл ҳаракати хавфсизлиги бўлинмаларида экологик операторлар томонидан берилади.
Транспорт эгаси ихтиёрий равишда экологик стикер олиш учун ИИВ Жамоат хавфсизлиги департаменти Йўл ҳаракати хавфсизлиги хизмати расмий веб-сайти ёки Ягона интерактив давлат хизматлари портали (my.gov.uz) орқали мурожаат қилиши мумкин.
Ариза белгиланган талабларга мос бўлса, транспорт воситасига экологик тоифасига мувофиқ стикер берилади. Экологик стикерлар муддациз амал қилади.
Тошкентда ҳайдовчиларга экологик стикерлар бериш 2026 йил январь ойида бошланади.
Пойтахтдаги барча машиналарни экологик баҳолаш муддати ҳам 2027 йил ўрнига 2028 йил бошигача узайтирилди. Нукус шаҳри ва вилоят марказларида автомобилларни экологик баҳолаш учун 2031 йил январигача (илгари 2029-йилгача эди) муддат белгиланган. Бошқа ҳудудларда охирги муддат 2035 йил бошигача (илгари 2031 йил эди) белгиланди.
