Бухоро вилоятининг Вобкент туманида ўзаро тил бириктириб, оилали эркакни шантаж қилган икки дугона қўлга олинди. Бу ҳақда Ички ишлар вазирлиги хабар берди.
Қайд этилишича, Вобкент туманида истиқомат қилувчи, оилали ва икки нафар фарзанднинг отаси ҳамда 1991 йилда Қоракўл туманида туғилган аёлнинг ўзаро ишқий муносабатдаги ёзишмалари бўлган. Ушбу ёзишмаларни аёлнинг дугонаси кўриб қолган.
Шундан сўнг, дугона ушбу маълумотларни ошкор қилиб, уни шарманда қилиш билан қўрқитган. Аёл эса сир фош бўлмаслиги учун дастлаб дугонасига пул берган. Бироқ кейинчалик ушбу икки дугона ўзаро жиноий тил бириктириб, вазиятдан моддий манфаат кўришни мақсад қилган. Кейин аёл эркак билан боғланган ва ёзишмаларни дугонаси кўриб қолганлигини ҳамда ундан пул талаб қилаётганлигини айтиб, унга босим ўтказган. Аёл ушбу сир сақланиши лозим бўлган маълумотларни йигитнинг оиласи ва турмуш ўртоғига етказиш ҳамда оиласини бузиб юбориш билан таҳдид қилиб, ундан жами 6 млн 800 минг сўм миқдоридаги пулларни товламачилик йўли билан талаб қилган.
Вобкент тумани Ички ишлар бўлими ходимлари томонидан тезкор тадбир ўтказилиб, савдо дўконларидан бирининг олдида эркакка тегишли бўлган Spark русумли автомашина ичида гумонланувчи талаб қилган 100 АҚШ доллари ва 5 млн 600 минг сўм миқдоридаги пулларни олаётган вақтида ашёвий далиллар билан қўлга олинган.
Ҳозирда мазкур ҳолат юзасидан гумонланувчиларга нисбатан Жиноят кодексининг 165-моддаси (товламачилик) 2-қисми “в” банди билан жиноят иши қўзғатилиб, дастлабки тергов ҳаракатлари олиб борилмоқда.
