АҚШ Президенти Дональд Трамп Европа Иттифоқидан импорт қилинадиган енгил ва юк автомобилларига бож ставкасини 25 фоизгача оширишга қарор қилди. У янги тарифлар келаси ҳафтадан кучга киришини ўзининг Truth Social ижтимоий тармоғида маълум қилди.
Трамп бу қарорини Европа Иттифоқи аввал тузилган савдо келишуви шартларига риоя қилмаётгани билан изоҳлаган. Бироқ у айнан қайси мажбуриятлар бузилганини аниқлаштирмаган.
Шу билан бирга, АҚШ ҳудудида ишлаб чиқарилган Европа автомобилларга ушбу божлар татбиқ этилмаслиги таъкидланган. Президент, шунингдек, АҚШда умумий қиймати 100 миллиард доллардан ортиқ бўлган янги автомобиль заводлари қурилаётганини билдириб, улар яқин орада ишга тушишини қайд этган.
Эслатиб ўтамиз, 2025 йил июль ойида АҚШ ва Европа Иттифоқи ўртасида “савдо уруши”дан сўнг келишув имзоланган эди. Унга кўра, Европадан АҚШга экспорт қилинадиган маҳсулотларга 15 фоизлик бож жорий этилган, Европа эса АҚШ товарларини божхона тўловларисиз қабул қилиш, инвестицияларни кенгайтириш ҳамда Америка энергия ресурслари ва ҳарбий техникасига талабни кафолатлашга рози бўлган.
2026 йил 20 февраль куни АҚШ Олий суди Трамп илгари жорий қилган божларнинг катта қисмини бекор қилган эди. Суд Президент ўз ваколатларини ошириб юборган, деган хулосага келган. Шундан сўнг Трамп бу қарордан норози эканини билдирган, бироқ божларни қайта тиклашнинг бошқа йўлларини топишини айтганди.
