АҚШнинг махсус элчиси Том Баррак Ливанни “омадсиз давлат” деб атади ва ҳукумат “Ҳизбуллоҳ” қўлида эканини таъкидлади.
Барракнинг ўзининг мазкур фикрларини 1 ноябрь куни Баҳрайнда ўтказилган Manama Dialogue 2025 халқаро анжуманида билдирган. Унинг айтишича, Ливан раҳбарияти барқарор позицияда турган бўлса-да, “Ҳизбуллоҳ”нинг ҳарбий таъсирини чеклаш бўйича етарли ҳаракат қилмаган.
Дипломат, шунингдек, Исроил Ливан билан чегара бўйича келишувга тайёрлигини билдирган ва икки давлат ўртасида мулоқот йўқлигини “мантиқсиз ҳолат” деб баҳолаган. Барракнинг сўзларига кўра, Исроил Ливандаги вазият ривожига қараб жавоб қайтариши мумкин.
Ливан — инқирозга юз тутган давлат. Марказий банк мавжуд эмас, банк тизими ишдан чиққан. Электр энергияси деярли йўқ — одамлар хусусий генераторлардан фойдаланади. Сув ва таълим ҳам хусусий секторга боғлиқ. Аслида ҳукумат “Ҳизбуллоҳ” қўлига ўтган. Гуруҳ мамлакат жанубида аҳолини сув ва таълим билан таъминлайди. “Ҳизбуллоҳ”да 40 минг жангчи бор, Ливан армиясида эса 60 минг. Аммо уларнинг маоши 275 доллар, “Ҳизбуллоҳ” жангчилари эса ойига 2200 доллар топади. Гуруҳ 15–20 мингта ракета ва снарядга эга, армияда эса эски жип ва автоматлар бор холос, деган Баррак.
